自願醫保大戰開打

今個月自願醫保掀起戰幔，幾間專注一般保險嘅公司同新興嘅純網上保險公司，都推出保費比市場平均仲平一截嘅自願醫保標準計劃產品，標榜所有投保以至索償都係網上進行，免佣免中介。好多保險中介人都表示擔心，因為今次統一條款嘅自願醫保產品，保費高低成為投保人重要決定因素，純網上保險呢方面的確有優勢，有機會打響知名度。

不過有保險老行尊就話未驚過。正所謂「一樣米養百樣人」，好似去酒店，推門係人都識，但點解五星級酒店會有門僮幫客人開門；又例如日本百貨公司到今時今日都仲有揸𨋢員。因此保險中介人行服務至上嘅路綫，憑住同客戶建立關係，都仲有大把市場。保寶達人聽過好多醫保客戶因病入院，保險代理探病又盡責跟進索償，令客戶好感動嘅故事，唔知純網上保險公司又做唔做到咁有人情味嘅服務呢？

講起網上VHIS，保險界盛傳，請到薯片叔叔擔任資深顧問嘅新晉網上保險公司「煲呔」，其中一個股東係近年市場上相當進取嘅「太陽」，由於雙方關係不簡單，會進行交叉銷售咁話。為求真相，保寶達人特意踩上「煲呔」自願醫保發布會。當日薯片叔叔同「太陽」代表都係座上客，有傳媒喺發問環節一開始，就急不及待問起「煲呔」同「太陽」嘅關係，但「煲呔」主席就斬釘截鐵咁話，「太陽」只係其中一位投資者，兩間公司係獨立運作。官方都已經清楚回應，各位行家應該可以放心！

保寶達人 – 為您八盡保險天下事

更多保寶達人手記 Click Here