提升最低學歷要求影響深遠

以前聽啲前輩話,就算讀書唔成「會考零分」,靠把口入行做保險Sales都可以搵到食,但相信以後無呢支歌仔唱喇!獨立保監局去年「放風」,擬提升保險持牌人最低學歷要求,新制度下持牌人要中學文憑試五科達到2級或以上成績(包括中文或英文及數學),先可獲發牌照。消息人士指新要求預計9月有機會正式落實。

近年香港保險業生意持續好景,吸引大量來自五湖四海、大江南北嘅新人入行,令從業員人數近年膨脹至近10萬大軍,當中唔少屬於「國家隊」,其中又有唔少係「港漂」,論學歷佢哋絕對無敵,碩士只係基本;有團隊甚至擁有雙PHD學歷嘅「博士」,提升學歷要求對佢哋完全無關痛癢。

 

學識高,誠信自然高?

由於愈來愈多「港漂」及本地大學畢業生加入,行業平均學歷的確係高咗,所以令提升學歷要求到文憑試五科合格,聽落好合理。的確,現今保險產品愈來愈複雜,保險科技應用亦開始普及,保險從業員如果連中學文憑試或會考五科合格學歷都無,點樣向客戶解釋產品條款呢?但另一方面,愈叻愈識出古惑,呢啲個案有一定資歷嘅行家肯定知唔少。好多以「本地薑」為主嘅保險團隊,負責請人嘅經理就有啲擔憂,皆因佢哋閱人無數,始終覺得誠信同操守先係最緊要,高學歷雖然代表有一定學識,但未必代表同等嘅誠信。

 

大專程度先係真正底綫

聽行業消息人士講,保監局就提升最低學歷,原本「開價」至大專程度,之後業界「還價」,最後先定為現時公布嘅水平,仲設有祖父條款及過渡性安排(註1)。不過保險人唔好咁老定,當學歷要求正式「上馬」後,過多幾年後有可能再提升,因為大專程度相信先係保監局心目中真正嗰條綫。

 

講到尾,High Tech、High Touch同High Trust其實同等重要,保險從業員要走向專業化,知識、服務同誠信缺一不可。所以無論係將來想入行,抑或今年成功入閘嘅新人,甚至獲得豁免嘅「祖父」輩,如果學歷未符合新要求,最好定立係3至5年內取得大專程度學歷嘅進修計劃。

 

保寶達人為您八盡保險天下事

 

1 – 根據保監局建議,任何在法定發牌制度實施之前已獲有效登記的中介人,均會在3年過渡期內被視為持牌人士,並豁免資深從業員的最低學歷要求,亦豁免擁有15年行業經驗的人士在新制度下負責人須符合的最低學歷要求。

 

更多保寶達人手記Click Here