保險公司入面可能有零零漆？

保寶達人早幾日同幾個保險大隊長一齊Happy Hour，其中一個就話保險界最近盛傳一件尋人啟「事」，令佢聽咗之後都不禁懷疑agent係網上嘅一舉一動，會唔會真係俾人監視住。

大家都知每間保險公司，定期都會send一啲內部資料同指引俾同事，當然有啲係可以俾客，亦有部分係唔應該外傳嘅。事緣盛傳有間公司嘅agent收到一份公司內部通告，一時間開心得滯，無睇清楚就將張通告內容上載咗係自己個微信度，連公司logo同通告number都無遮到。而佢朋友圈嘅同事及朋友，喺幾個鐘之內亦轉發咗呢個post好多次。

傳聞係同日夜晚時份，有人突然收到上級電話，對方指名道姓咁問佢團隊有轉發過呢個post嘅同事要立即刪po同將有關資料「下架」咁話。我呢個大隊長老友聽到呢單料之後都不禁懷疑，可以喺幾個鐘頭之內就將所有「涉案」人士起晒出嚟嘅話，其實會唔會真係保險公司有隊人內部時刻追蹤住啲agent嘅社交媒體account呢?即每個agent嗰一堆followers當中，埋伏咗專門搜查違規問題嘅內部糾察人員。

講開內部審查，其實保險公司透過網上「放蛇」捉違規嘅agent，喺行內已經唔係咩秘密，甚至有保險公司專門搵人放對家公司agent蛇，打擊對方嘅生意。保寶達人有個大隊長老友就講笑咁講，「放蛇」嘅人員做戲做到似足《警訊》咁，用盡渾身解數引誘目標，個agent如果一時間抵受唔住，例如真係飛上咗大陸去傾保單，輕則俾公司內部停牌處分，重則連份工都可能無埋。

要識破係咪「放蛇」，都係嗰句「邊有咁大隻蛤乸隨街跳」。即係突然有陌生人喺微信自動獻身想買保單，同早排好hit嘅「微信美女誘買倫敦金」一樣，十之八九「有伏」啦！

不過講還講，呢單野保險達人都係聽番嚟亦證實唔到來源，所以都係純屬吹水，至於內容就真係信不信由你啦…

保寶達人 – 為您八盡保險天下事

更多保寶達人手記Click Here