保險大隊長與圓桌武士之辛酸血淚史

獲得圓桌武士會員資格,一直都係對保險巴打銷售成績嘅一大肯定,不過其實帶領住圓桌武士嘅大隊長入面都有唔少辛酸事。話說呢幾年保險行業相當風光,連帶圓桌武士人數亦不斷創新高,其中幾間帶頭公司更加係互不相讓,鬥多圓桌武士成為每年嘅重頭戲。

最驚「跳草裙舞」

係求人心切嘅情況下,唔同團隊入面嘅圓桌武士可以話係「皇帝仔女」。保寶達人上星期同幾個保險大隊長一齊Happy Hour,佢哋一講起圓桌武士嘅心態,都忍唔住大吐苦水。

 

而家好多大隊長最驚旗下啲圓桌武士「跳草裙舞」,總之佢哋一話「跳槽」就乜都應承,只要唔走就得。好似話隔籬隊伍「到數」有獎金,自己獎金都要加倍咁;或者最近俾對家招手,要求有額外津貼等等。總之大隊長為咗留人,真係奇招百出,但講到尾,咪又係割自己忽肉俾佢哋。

 

風氣蔓延至中型公司

最勞氣嗰位大隊長,更加話有啲圓桌武士當正公司同大隊長係仇人。佢哋覺得上綫食咗自己啲佣金,有機會就要問佢哋攞返;更加有人索性唔交單搏炒,但由於公司鬥緊圓桌武士人數,攬住啲圓桌武士唔俾炒,大隊長夾喺中間就變得好難做。

 

而家鬥圓桌武士嘅風氣,唔單止最大嘅公司有,仲吹到中型公司,因為大有大鬥,小有小鬥,大家都用盡各種方式谷圓桌武士。睇嚟表面風光,內裏心酸嘅大隊長會愈嚟愈多喇。

 

保寶達人為您八盡保險天下事

更多保寶達人手記Click Here