突破核心外圍 為前綫發聲

由於之前寫咗幾篇同保險行業有關的八卦趣聞,所以而家每次撞到識得嘅保險大隊長,佢哋都叫保寶達人再爆多啲料,幫吓行業人士發聲咁話。不過,今次想轉返講啲比較正經嘅行業監管話題,都係關於為同行發聲嘅。

身為八卦財經公關,保寶達人對保險業嘅發展其實都好肉緊,除咗因為有唔少客都係保險業人士,身邊亦有好多朋友因為遇到一個好嘅保險Agent,而喺人生遇到困難嘅時候馬上得到援手。當然,唔同行業入面少不免都係有少數害群之馬,所以要有不斷完善嘅監管制度亦係必須。

 

權力核心 欠前綫同業聲音

獨立保監局將會喺今年內接替3間自律機構,負責保險中介人嘅監管工作,並制定法定保險中介人發牌制度,以及保險從業員專業標準同操守準則。保監局嘅角色同職能,如果做得好,對行業發展絕對有好處。但係唔少關心行業發展嘅老行尊都有一個未了嘅心願,就係希望保監局入面有更多來自前綫同業嘅聲音。

 

而家喺保監局董事會入面其實已經有已退休的前保險公司管理層,但在職嘅前綫從業員代表就一個都無。即使有任職保險前綫嘅代表想提供意見,佢哋都只能加入屬於「核心外圍」嘅關注小組,而進入唔到真正嘅權力核心。所以有啲具爭議性嘅監管條例改動或新建議做法,往往引起前綫從業員擔憂,搞到好似監管同被監管者變成對立咁。

 

一個硬幣都有公字兩面,每個人都應該獨立思考每一件事,唔係話立場對立,就對面做任何嘢都係錯。雖然要花好長時間,但包容、理解同溝通先係真正解決分歧嘅辦法。行業具權力者應該聆聽更多元化嘅聲音,除咗發布諮詢文件公開徵集意見外,其實引入更多不同「光譜」嘅代表入領導核心,先係最直接嘅做法。

 

前綫團體會長可納入保監局

雖然事到如今,保監局嘅運作已經上咗軌道,要返轉頭再選人入局已經太遲。但有唔少做過行業團體會長嘅資深人士都主張,將來保監局可考慮將一啲具代表性嘅保險前綫從業員團體會長,納入成為保監局相關委員會嘅固定成員,等佢哋可以為前綫嘅中介人發聲,話晒有好多行業前綫發生緊嘅問題同情況,非行內人係好難一時三刻理解同明白嘅!

 

雖然呢個理想唔知幾時可以實現,但相信一眾前綫從業員都會一條心,支持業界代表繼續努力爭取,始終行業中介人有近10萬,每一個法律同監管制度上嘅改變同決定,都可能影響緊10萬人同佢哋背後家庭嘅飯碗。

 

保寶達人為您八盡保險天下事

更多保寶達人手記Click Here