保險科技究竟係好事定壞事？

大家都知香港現時嘅科技發展，莫講話金融保險科技，連普通科技都追唔到中國內地。香港作為國際金融中心一定要作出改變，好似發牌俾網上同虛擬保險公司經營業務，推動FinTech及保險科技發展等，不過有保險人就擔心科技會搶走佢哋飯碗，究竟真相係點？

有熟悉保險公司運作嘅資深保險大隊長認為，科技可以做到一樣嘢令保險公司拍爛手掌。一直以來，同填表有關嘅Compliance問題，最易令Agent中招，將來獨立保監局執法更嚴格，可以預計有更多Agent會喺呢方面出問題。FinTech最大功用就係將資料統一處理，減少人為錯誤。

中招機會大大減低

好似而家唔少公司已經唔使再填F-Form，填「財務需要分析表」FNA亦可以網上填，由系統統一格式，將出現人為疏忽嘅可能性減至最低。又例如而家Agent幫客做Pre-underwriting，只要用iPad同客戶經網上系統做，就可以完全按照公司要求，15-20分鐘左右就可以出單，令客戶有更好體驗。

綜合幾位大隊長嘅意見，現時保險科技嘅定位並唔係減省人手，可能對於內部後勤同事係有篩選作用，但更大嘅影響係可以大量增聘前線人手。保險公司靠FinTech、人工智能等系統，可以請多啲前線代理搵生意，加上而家新請嘅代理，連座位都無，Office都唔使擴充。有保險大隊長就話，靠FinTech可以喺唔加人手嘅情況下，支援多幾倍前線代理，例如有大公司呢幾年發展到有2萬幾個代理，但Office員工團隊係無多到。

把握科技增值方為上策

既然保險公司能夠減省成本，將啲資源撥去增聘前線代理，咁做前線咪好好景？閱人無數嘅大隊長就話，好唔好景要睇個Agent定位係乜？如果平日工作就係幫個客填form、送保單，只識做啲擔擔抬抬嘅嘢，呢啲「恐龍化石」將來可能都係無得撈。皆因客戶都會進化，尤其內地客戶更先進，佢哋習慣用手機App查保單，Claim就影張相就得，根本唔使Agent跑腿。講到尾，保險中介人要增值自己，擁抱科技，走向專業化並以顧問做定位，先係上策。

保寶達人 – 為您八盡保險天下事

更多保寶達人手記Click Here