保險辦公室不能說的「房」事

各保險團隊由於不斷擴充前綫隊伍,辦公室塞到爆晒,有啲選擇搬Office,有啲就重新裝修,總之就以有限空間放無限嘅人為目標。由於唔少保險公司嘅管理層都係外國人,佢哋通常傾向削減團隊啲老細房嘅數目,一來減低成本,二來佢哋比較鍾意開放式辦公室。但多數本地大隊長一向坐開房,點會咁容易就範?於是就展開咗一場辦公室「房」事角力。

好多保險大隊長都呻,話就話搬Office,但好多時愈搬愈細。有啲唔算好多人嘅District,原本有獨立Office,搬咗之後要同其他District一齊坐。有個大隊長旗下有成200幾人,都只係分到3,000幾呎Office。當然大隊長都仲有間百幾呎嘅房坐下,但剩低幾間房,要分俾十幾個中隊長簡直係超級難題,個個都為咗間房嗌生嗌死。於是大隊長就斬釘截鐵咁話,唔好再同我講年資,做到指定業績先有房坐,就算反面都無計㗎喇!

 

Book房「扮工」夠體面

另外有啲團隊,就行外國流行嘅「房間共享制」,即係特別整幾間裝修特別高級嘅老細房,入面有晒辦公同見客嘅設備,不過其實係借用嚟「扮工」至真。任何隊長如果有客要見,要入系統Book房,到時將自己個名攝入房牌位置,咁呢個時段間房就屬於你。啲客唔知咁多,睇落都幾體面,呃得吓人㗎!有啲中小型公司去得再盡啲,連比較大間嘅Meeting Room都無,每當需要搞Recruitment、Training,甚至開比較多人嘅會,一律出去租地方,租開某個場仲可以平啲,咁就大大減低固定開支。

 

當一眾隊長為爭房都咁頭痕,可想而知前綫Agent爭位情況應該更慘烈。近年好多新Office已經行「Locker制」,用locker存放個人物品,好彩嘅可能3個人share一個位,唔好彩嘅就連位都無,被發配到開放式大枱(通常叫Swimming Pool),要連續幾個月做到某條數,有成績先可以升級。聽聞某間擁有最多MDRT嘅公司,內部有條不成文規定,只有成為MDRT先有個人座位。

 

年資無用 交數緊要

不過呢啲爭房爭位情況都有大隊長表示支持,有隊長就話好多時咁大個位,都係用嚟養老鼠(蛀米大蟲),其實年資喺呢行已經唔再重要,最緊要係睇數。都係嘅,近年大勇嘅IANG大軍,可能成個月先返公司一次,講真俾個位佢哋都係嘥。呢行本來就唔係咁重視返唔返工,總之交到數就乜都得!

 

保寶達人為您八盡保險天下事

更多保寶達人手記Click Here