發掘見客新地點

受近期反修例事件引起嘅一連串風波影響，保寶孻妹相信唔少業界朋友可能都為點樣揀一個合適嘅地方見客而感到頭痛。其實見客地點除咗一般嘅連鎖咖啡店、餐廳同公司外，仲有好多唔同嘅地方都值得大家考慮。一個特別嘅見客地方甚至可以令客人留低深刻印象，增加成功簽單嘅機會。以下就等我為大家介紹4個香港具有特色嘅見客新地方喇！

觀塘

過去行家們見客可能會集中喺港島區，但近年觀塘因為受惠於「起動九龍東」計劃，相繼有唔少跨國企業、保險公司、政府部門甚至新酒店都選擇落戶九龍東一帶，當中更以觀塘為發展嘅中心。加上觀塘交通方便，地點亦非常便利，相信會成為港島區外嘅見客熱點！未來，政府仲打算興建一條貫通九龍東嘅單軌鐵路，相信到時九龍東嘅交通將會更加暢通無阻。

西貢

離開市區，有被形容為「香港後花園」的西貢亦係唔錯嘅見客地點。西貢區內有好多唔同嘅特色小店，而且風景優美，行家們不妨考慮喺區內搵一間充滿異國風情嘅咖啡廳，一邊享受涼快嘅海風，一邊同客人品嚐住特色滴漏咖啡，相信喺一個舒適放鬆嘅環境下慢慢傾，絕對有助促成單生意㗎！

赤柱

第3個要介紹嘅地點同樣充滿異國情調，就係位於港島南面嘅海邊小鎮──赤柱。赤柱店舖林立，喺赤柱大街上亦設有露天餐廳，可以為客人提供一個悠閒嘅環境。要數赤柱最出名嘅自然唔少得已經超過160年歷史嘅美利樓喇，整座美利樓都充滿住維多利亞嘅古典氣息，入夜之後，喺燈光嘅映照下，更加成為整個小鎮嘅亮點，行家們或者可以考慮一下同客人喺美利樓好好享受一餐難忘嘅晚餐。

科學園

最後一個推介俾各位嘅地方就係位於沙田嘅科學園。受惠於近年政府積極鼓勵發展創新科技，令園內設施配套一應俱全。食肆、會所以至舉辦大型會議嘅場地都應有盡有。同時，科學園正正坐落香港中文大學旁邊，行家們不妨考慮帶客戶到中大一遊，欣賞一下校園內嘅風景同感受下大學嘅人文氣息。