內地客急挫逾7成　IANG團隊諗計變招

近年內地成為保險業生意重要來源，但據保監局表示，近月因應香港社會局勢，內地客戶來港購買保險客量急挫7成半。唔少靠內地客食糊嘅團隊，最近就一片愁雲慘霧。以8月為例，唔少保險大隊長話生意下跌唔係「斷崖式」，直情係「斷喉式」！

今次首當其衝嘅，相信係依靠內地客源、以IANG為主力嘅團隊。早兩年內地人來港投保情況熾熱，內地客佔整體新造保單保費接近一半。而今年喺未發生呢場社會運動之前，上半年內地客佔整體新造保費約26%，經已呈減退趨勢，而第三季相信更加會大跌。

IANG難管 亂sell易踩地雷

當IANG光環開始褪色，一啲一直都存在，但以前俾一張張大單冚住嘅問題，就會浮返出嚟。IANG帶嚟嘅「內患」，一向令唔少大隊長頭痛，皆因IANG一向被賦予好多特權，最普遍就係佢哋好少返公司，有啲可能一個月先返一次工，所以主管同佢哋溝通開會嘅時間好少，做培訓嗰啲更加唔使旨意。雖然好多IANG都擁有高學歷，但有學歷唔等如有實力，新人欠缺經驗，始終需要持續培訓。

為咗爭取生意，IANG喺內地見客時，如果培訓不足、提醒唔夠，好容易誤踩灰色地帶；加上「遠水難救近火」，所以有啲大隊長為防佢哋亂咁Sell，索性只叫IANG集中火力Sell一隻產品。不過，保險業不斷走向專業化，單一產品其實係行返回頭路。最近保監局亦提醒業界唔好過分集中單一業務，要平衡風險。

內地客源飄忽 雙綫發展最穩陣

無錯內地單金額大，一張等於人哋幾張，但始終內地客生意容易受政策影響，之前已有內地打擊走資嘅措施，加上來港投保熱潮從高位回落，今次反修例風波更加話俾市場聽，北水真係可以話停就停。睇嚟主力內地客路綫嘅大隊長們，長遠真係要諗吓點樣中港雙綫平衡發展喇！

保寶達人 – 為您八盡保險天下事

更多保寶達人手記Click Here