學歷寛限期？流言滿天飛

近排保險業一片風聲鶴唳，但喺市況一面向下嘅情況下，有一項數字竟然爆升，講緊嘅係新保險中介人嘅註冊申請。有知情嘅保險大隊長話，最後兩個月新增咗幾千個新申請，大公司更加係以千計。

舊申請過渡保監局致誤會

新申請上升嘅原因，當然唔係因為生意多咗啦，而係為咗「趕尾班車」，想避開新規定嘅學歷要求，即係中學文憑試5科合格，包括中文或英文，以及數學。講開又講，早排保寶達人聽到一啲行家話，呢個學歷新要求將延至2020年1月先正式實施，我梗係第一時間向資深大隊長Fact Check啦，結果證實係流料，保監方面從來無討論過會有寬限期。

保寶達人估或者係有人搞唔清楚，因為保險代理登記委員會收到嘅新申請，若果唔夠時間喺交接前完成批核，就會過渡到保監局處理，而保監會沿用舊學歷要求作審批。

註冊條件趨嚴謹入行要快

換句話講，9月23號之後向保監局遞交嘅新申請，一律都要符合最新嘅學歷要求，千祈唔好以訛傳訛，聽人亂講以為「蘇州過後仲有艇搭」。不過關於學歷，的確仲有樣嘢係到而家都未有定案嘅，就係內地學歷互認，要留待保監日後公布。不過肯定嘅係，長遠嚟講，中介人註冊要求將會愈來愈嚴謹，有意加入保險業嘅人士，如果學歷只係僅僅過關，就真係要盡快行動喇！

最後，有位保險大隊長想借保寶達人專欄呼籲業界多關心及表達訴求，例如早前8月30號舉行嘅行業關注大會，雖然現場500個座位將近坐滿，但如果可以企滿會場，等保監睇到保險人嘅團結就更好。不過係Q&A環節，行家都好積極提問，尢其係同學歷有關嘅問題。嗰位大隊長好希望更多行家會主動留意行業發展，並且勇於發聲，俾保監同政府聽到更多前綫保險從業員嘅訴求。