《緊急法》令保單失效係真唔係呀?

上星期六政府引用《緊急法》實施《禁蒙面法》之後,網上即有傳言話保險公司將唔會對現有保險作出賠償。嘩!講到「乜都無得賠」咁嚴重,《緊急法》真係凌駕一切?其實唔使FC都知,咁多保險公司打開門做生意,點會一刀切話唔賠吖,所以政府同保險界好快就作出澄清。

以個人嚟講,示威遊行主要影響三類保險──醫療、意外同人壽。好似尋日保險業聯會聲明咁講,保單係商業合約,投保人同保險公司都受保單條款同條件約束。實施《緊急法》唔會影響保險合約入面嘅條款同條件,更加唔會凌駕保單嘅效力。一句講晒,即係所有保單條款維持不變囉!

 

有無得賠 視乎保單條款細則

保寶達人專欄之前都提過,唔同公司嘅同類保險產品都有唔同條款,會唔會賠償係視乎個別保單列明嘅條款細則同不保事項。以自願醫保為例,喺不保事項中雖然無提及遊行、示威、暴動、恐怖襲擊等情況,但就列明唔會賠償因「參與非法活動」而產生嘅醫療費用。諗真啲,蒙唔蒙面都可以參與非法活動,如果保險公司認為係因為呢個原因引致受傷,咁有無蒙面其實都無得賠。

 

至於意外保險,要留意個別保單對意外嘅定義,有啲就會列明不保因「罷工、暴亂」引致嘅傷亡。所以講到尾都係睇條款,我估大部分人都唔會記得條款細則,咁仲唔快啲摷返份保單出嚟睇清楚,或者向你嘅保險中介人/保險公司查詢?

 

活動保險忽然熱門

講完個人保險,講下商業保險,究竟遭到損壞嘅店舖有無得賠呢?其實同個人保險一樣,都係同《緊急法》無關,主要視乎保單受保事項有無包惡意破壞同暴亂損失,通常一早買落嘅商舖或商場綜合保都無呢啲條款,所以最近保險公司都收到唔少加保嘅查詢。

 

最後,近排仲有一種保險多咗行家談論,就係舉辦活動要買嘅活動保險,由於活動風險評估因素多咗,保費理所當然亦都貴咗,有啲甚至要買埋「活動取消保險」,減低受保活動取消或延期時造成嘅損失。

 

保寶達人為您八盡保險天下事

更多保寶達人手記Click Here