保險代理都玩「大細牌」？

最近同班保險大隊長Happy Hour，聽得最多嘅除咗趕尾班車「甩轆」之外，就係呻而家請人愈來愈難，更有人提議保監局未來仿傚地產代理嘅「大細牌」制度，喺現時發牌制度下新增一種「Junior」牌，只能夠銷售一啲較基本嘅產品咁話。

不過佢哋所講嘅「分類發牌」做法，同而家地產嘅「大細牌」其實唔一樣。地產代理嘅大牌（又稱E牌）同細牌（又稱S牌）嘅分別，簡單嚟講係細牌只能做「散仔」，而大牌就可以做到地產公司老闆、董事，而佢哋平日實際做緊嘅銷售工作係一樣嘅，無話S牌唔可以Sell豪宅或工商舖。

保險專業化 難走回頭路

相信好多人都唔知，其實保險業而家都有「旅遊保險代理」類別，旅遊代理商及其職員只要通過「旅遊保險代理人」考試，經保險公司委任及登記成為保險代理人及其業務代表，就可以銷售旅遊保險，但只限於佢哋為顧客安排嘅旅行團、包辦旅遊、旅程或其他旅行服務有關嘅旅遊保險。雖然分類發牌的確有先例可循，不過保寶達人覺得政府明顯想保險走向專業化，持續提升入行門檻已成定局，相信好難會走返回頭路降低入行門檻啦！

有危便有機 逆境吸人才

講返請人難，保寶達人其實並唔同意，因為所謂逆境，都係睇你用咩角度去睇，半杯水有人覺得少咗半杯唔夠飲，亦有人認為咁先有空間加返半杯。近兩個月經濟差，其實會唔會係保險行業一個吸納優質人才嘅黃金機會呢？好似保寶達人做緊嘅公關呢行，近來都聽聞有唔少資深中層「出走」，當中加入保險行業嘅亦大有人在（因為俾佢咃約咗出嚟食飯兼Sell保險），呢班人既有經驗又有人脈，都唔知幾受大隊長們重用，關鍵在於佢哋有無走向專業化嘅決心，進修更多相關專業資格。

保寶達人 – 為您八盡保險天下事

更多保寶達人手記Click Here