航空公司「被釘牌」 旅遊保險包唔包？

屢傳財困嘅香港航空，上星期喺Deadline前搵到新資金，暫時保得住個航空牌照，不過港航財困都傳咗差唔多兩年，雖然今次暫且過關，但唔擔保之後都會無事，始終咁大間公司要扭轉財務狀況唔係一朝一夕嘅事，要重建消費者同合作夥伴嘅信心亦唔容易。

因為港航呢單嘢，上星期保險啲group都講多咗旅遊保話題，皆因有間保險公司出咗公告，講到明剔除香港航空客戶於旗下旅遊保計劃嘅受保範圍，直至另行通知。

如果一間航空公司個牌被撤銷，全部航綫都要停飛，咁買咗之後出發機票嘅乘客點算好呢？理論上，經旅行社買機票嘅，可以向旅行社協商更換航空公司等安排；如果係自由行買機票，就要睇吓涉事航空+公司有無補償措施，又或者自己份旅遊保有無得賠（前提係買咗或有買全年保）。

「釘牌」唔代表「倒閉」

凡係呢類有無得賠嘅問題，講到尾都係要睇「保單條款」同「事件定性」。首先要睇保險公司條文中嘅「不保事項」有無包括航空公司營運問題、破產或清盤所引致嘅損失，如果列明不保，咁就無辦法喇！其次睇吓承保事項，而家市場上只有少數旅遊保會保障「航空公司倒閉」所引致嘅損失，咁係咪代表買咗呢幾間公司嘅旅遊保就有得賠？

答案又係未必，因為關鍵在於「定性」。保單條款中只列明航空公司「倒閉」先會賠，而唔係「釘牌」，所以「釘牌」好大機會係無得賠。或者咁講，「釘牌」係有可能會導致「倒閉」，但唔係等同「倒閉」，因為「釘牌」可能只係暫時性，而且航空公司之後可能會重新獲發牌都唔定。

「倒閉」都唔代表有得賠

好喇，咁如果真係「倒閉」有得賠喇啩！咪住，頭先話咗有保險公司開宗明義指明旗下旅遊保唔保港航客，即係話其他航空公司出事「倒閉」有得賠，但港航因為承保風險太高，除非保單好早之前買落，否則新保單經已唔再受保。

其實買旅遊保都係為咗以防萬一，無人真係想用。今次港航事件鬧得咁大，保險公司只係好醒目咁做好風險管理，以免不必要嘅索償，唔受保都好正常。

保寶達人 – 為您八盡保險天下事

更多保寶達人手記Click Here