專業角度分析 話你知商舖「被裝修」有無得賠

社會不穩情況持續,唔少商場店舖、街舖同分行遭到破壞,令相關保險索償議題備受關注。因為網上相關消息眾說紛紜,保寶達人就特登去請教專做GI嘅大隊長,希望有更清晰嘅答案。

認識「SRCC」同「MD

 

從保險專業角度睇,影響呢類賠償有兩個Term一定要識,第一個係「SRCC」,全稱「Strike, Riot and Civil Commotion」(罷工、暴動及民事騷亂),店舖綜合保險如果加入SRCC條款,呢類商戶一旦「中招」,就算當日活動真係被定性為「暴亂」,或破壞者被補後被判暴動罪,保險公司都會賠。不過,關鍵係有加SRCC嘅單唔多,因為香港以往好少呢類事件發生,一般商戶好少額外加保。

 

咁好似有幾十間舖頭「被裝修」嘅「一圈」點算?唔通真係要焗啃?咁係時候到「MD」(Malicious Destruction)出場喇。一般財物保險會承保惡意破壞引致嘅損失。未有SRCC但又受到破壞嘅商戶,一般會聲稱受到「惡意破壞」向保險公司索償,不過有啲保單嘅MD墊底費都幾高,商戶要承擔部分損失,但就叫做好過無。

 

保險公司判定損失係咪因暴動引起,會參照政府定性。由於政府同法院都無清晰定性,保險公司更加唔會輕舉妄動,所以GI大隊長話保險公司都傾向賠,因為如果唔賠,咪即係代政府定性?相信無保險公司會主動咁做,所以有好多索償個案而家都「撠」住喺度,不過一路拖落去始終唔係辦法,相信有機會都係以「惡意破壞」條款賠償算數。

 

講到商戶出年嘅投保計劃,GI大隊長話加SRCC理所當然成為大熱,不過就算商戶願意俾額外保費,都未必買得到,因為保險公司如果喺呢段時期承保,有機會「好快就輸錢」。不過GI大隊長話都有個別保險公司肯接,但多數會設上限,例如保額200萬入面,以SRCC索償而獲得嘅賠償最多只得50萬。

 

「活動取消保險」更難買

 

比起加SRCC,其實而家更加難買到嘅係「活動取消保險」,呢類保險係保障因各種情況導致活動取消或更改地點而出現嘅潛在損失,以往比較少人問津,但而家就好多機構查詢,因為真係會蝕到入肉。GI大隊長就爆早前宣布取消個唱嘅「矇豬眼」,主辦單位就曾經周圍問邊度有活動取消保險買,但最終由香港搵到去英國,都無一間保險公司願意承保。

 

保寶達人為您八盡保險天下事

更多保寶達人手記Click Here