交接一刀切　搞到做唔切

先預祝各位保險人新年進步！下星期二大除夕，又到保險公司計數嘅重要日子，講緊除咗做生意條數，仲有團隊人數，因為有啲保險公司俾旗下代理團隊嘅其中一個KPI，就係團隊人數，如果唔夠人隨時cut資源。

9月份正值監管機構交替，好多經理都叫新人一早遞交申請，點知有啲人一交無回頭，所以呢幾個月業界對保監局嘅效率都有唔少意見。保寶達人月初出席保險團體午宴，就撞到保監局高層Clement，一向有話直說嘅佢，好坦白咁話今次喺交接期處理保險中介人牌照申請時係有些少問題。

Clement承認923用一刀切做法交接風險較高，由於好多人都趕尾班車，到12月頭竟然積壓咗成3,000個申請，當中仲有唔少填錯資料要彈返轉頭，來來回回好花時間。另一個問題係電子申請平台無乜人用，發揮唔到原本想減省文書處理時間嘅作用。佢仲自爆要趕喺年底前以人手方式完成牌照申請工序，當局要調動內部人手同請熟手文員入data。

雖然的確造成不便，但保寶達人都欣賞呢種有錯就認，用盡辦法去搞返掂嘅態度，好過一直死口唔認衰吖。喺度亦幫口呼籲保險公司幫手推廣電子申請平台，同收集員工對點樣簡化申請表格填寫流程嘅意見，等保監可以簡化流程，令更多新晉從業員透過電子平台申請。

另一邊廂，已完成歷史使命嘅HKFI，原本可以乜都唔駛理，但係由於新舊系統嘅資料係唔會過渡，變相令一啲有需要拎返以前文件或紀錄嘅申請人，只能夠向HKFI求助，於是HKFI貼心咁推出「索取截至2019年9月22日的保險代理登記／處分紀錄」服務，每項資料收取行政費50元至130元不等。不過聽講呢項資料索取服務係有期限，因為再過一段時間所有HKFI嘅舊資料都會刪除，到時就肯俾錢都搵唔返。

保寶達人 – 為您八盡保險天下事

更多保寶達人手記Click Here