認識保單條款──受益人

人壽保單中,受益人喺賠償時會擔當一個非常重要地位,顧名思義,其實就係保單最後得益嘅人。但受益人原來都有分類,亦可以唔只一個人。

簡單嚟講,如果你係某保單唯一受益人,咁將來(Touch wood)收賠償時就好簡單,只需確認身份。不過如果受益人有兩位就要留心啦,如果大家都係第一受益人,收賠償時可均分賠償金額(除非權益人已指明用咩比例分,否則就係平分),如受益人有三個或以上都類同。

 

但受益人可以有先後啊!假設A係第一受益人而B係第二,咁賠償時只會賠俾A,B係分唔到任何賠償嘅,除非(又Touch Wood)A俾受保人更早離世,咁B就以後備身份補上得到全數賠償。

 

所以,係咪要Check Check自己嘅受益人身份呢?當然又係戴頭盔時間,以各保單條款為準呀!