自願醫保的秘密 Sell單最強人物

早排消費者委員會比較市面上自願醫保（VHIS）嘅標準及靈活計劃，發現29個標準計劃絕大部分保障範圍及保額相同，不過收嘅保費差距就幾大，最高可以達到2至3倍。

其實報告入面收費最高嗰啲保險公司，喺市場上並唔活躍，好多市民根本聽都未聽過。至於市面上比較出名嗰幾間大公司，保費係都有落差，但唔算好大，不過佢哋係VHIS市場上攞到嘅生意分別就好大嘞。根據江湖傳聞，有公司做成8萬幾張VHIS單，有啲就得萬幾二萬張。

內地客興趣不大

其實落差咁大嘅原因，同各間公司有唔同嘅「文化底蘊」有關。有啲公司差唔多一半生意來自內地客，佢哋對自願醫保自然唔會有太大興趣，就算個客想買醫療單都會推高端醫療Plan，所以推VHIS，特別係標準計劃根本唔中「痛點」。何況行內眾所周知，Agent做張醫療單，處理同跟進文件都比普通單花時間，佣金又少，以時間成本嚟講唔係好值搏。

佣金有限難上「榜」

有位大隊長仲點出一個關鍵因素。大家都知保險大隊嘅成績排行榜係幾咁重要，如果有得貼堂係Agent好大嘅榮譽，不過其實唔同公司嘅貼堂準則係唔同嘅，大致上分為「C榜」同「P榜」，C即係Commission計佣金，至於P就係Premium計保費。想喺「C榜」力爭上遊嘅Agent，自然想集中火力谷「C值」比較高嘅壽險單同投資單，醫保呢類GI單佣金通常唔高，又要花時間跟進，除非個客自己想買，否則都唔會主動提。

講到尾，保險公司高層同團隊大隊長嘅想法，先至係造成市場反應有咁大差別嘅主因。有啲老細專食「大茶飯」；有啲就打算「密食當三番」，所以俾Agent嘅「Driver」都唔同──即係如果公司俾高啲佣金，自然就會賣得多啲啦。

保寶達人 – 為您八盡保險天下事

更多保寶達人手記Click Here