保險界一條心 遙距簽單+抗疫基金助同業
今次新型肺炎（新型冠狀病毒，COVID-19）疫情嚴重，令好多行業都嗌晒救命，保險業特別係前綫Agent都係其中之一，而家想搵個客見吓面都好難，靠打電話或Zoom傾保單都仲可以，但最大問題係個簽名，如果個客唔想出街，除咗親自送份文件去個客屋企，都無乜其他方法。
因應呢個問題，早幾日保監局正式宣布推出「期間限定」嘅「遙距簽單」新安排，各大隊長當然叫好，因為今次疫情對保險業嘅衝擊，仲勁過上年社會運動，特別係一班靠內地單食糊嘅團隊，受到嘅衝擊更大，大家除咗希望疫情快啲過去，亦期望政府可以俾多啲支援。
業界齊心促成政府「開綠燈」
今次嘅「遙距簽單」安排雖然暫時只適用喺「合資格延期年金保單」（QDAP）同自願醫保（VHIS）兩類產品，但都算行出咗第一步，因為咁多年以嚟，除咗網上平台賣嘅GI （一般保險）產品同虛擬保險平台產品，喺「綫下」賣保險「見面簽單是常識吧」。不過今次為對抗疫情，估唔到連呢條金科玉律都可以打破。
據知情人士透露，呢次促成政府「開綠燈」，係整個業界包括保險公司代表、壽險行業規管與發展關注組（ICG）同保監局齊心協力、同一條心嘅成果。保寶達人收到風，呢個只係保險抗疫措施嘅第一階段，之後仲會有進一步措施，大家可以拭目以待。
「保協」全力協助確診同業
講到抗疫，前綫保險中介人手停口停，如果不幸「中招」，即使最後好返，但入院治療都需要一段時間，想「遙距簽單」都唔得，喺逆市期間對收入肯定有影響。一向關注保險從業員需要嘅「保協」（香港人壽保險從業員協會）就成立咗「新型冠狀病毒支援抗疫基金」，俾不幸確診新型肺炎嘅會員同保險從業員申請，最高可以獲得1萬蚊應急錢。
估唔到基金成立唔夠幾日，真係先後出現兩宗保險從業員確診。第一個係本港第51宗確診個案，職業報稱係保險經紀，而「保協」已成功聯絡到佢任職嘅經紀公司，協助嗰位同業辦理抗疫基金申請。而第二個case就係本港第56宗確診個案，任職醫療保險公司嘅辦公室文職員工，「保協」亦已經主動聯絡嗰間公司，睇吓點樣向嗰位員工提供協助。喺呢度希望兩位保險同業早日康復，回歸工作崗位。
保寶達人 – 為您八盡保險天下事
更多保寶達人手記Click Here
