用Zoom開會的日常保險人5大共鳴位

既然市場淡靜，不如講吓輕鬆啲嘅話題。相信呢段時間唔少保險人都用過「Zoom」嚟開會，保寶達人都會用Zoom同啲大隊長保持聯絡，有時仲會Sit-in吓佢哋啲內部視像會議，俾吓有關公關宣傳嘅意見。Zoom得多，自然見到唔少有趣嘅人同事，以下5件Zoom嘅「日常」，睇吓大家有無遇過。

5大用Zoom日常你中邊樣？

「素顏登場」：唔少人要在家工作，就突然連個Look都變得好「住家」，有啲平日散發「女神」氣場嘅女同事，喺Zoom竟然一度以「素顏眼鏡娘」Look登場，絕對「期間限定」。另外有啲就特登用「虛擬背景」功能，再開埋「美顏」（Zoom真係有，好似「美圖XX」嘅效果），令自己個樣變得膠膠哋。

「家人亂入」：大家喺公司只會見到同事本人，但係透過Zoom有時可以見識到佢屋企人，不過佢哋大多數都只係以「聲優」形式登場，可能唔知道阿爸或阿媽喺度Zoom緊啩，周不時會聽到佢哋喺背景閒話家常，只不過喺Zoom度大家都唔好意思講，直到終於有「勇者」出聲提佢，大家心入面都暗暗叫好。

「吟遊花園」：好多保險人習慣周圍流動，邊行邊傾電話，連Zoom都坐唔定；有啲仲由屋企一路行一路開住Zoom，好似YouTuber咁帶大家遊吓佢個豪宅屋苑樓下個花園同停車場，搞到我有時一路睇，一路諗係邊個屋苑，開會內容完全無入到耳。

「有聲定格」：唔知係咪網絡接收得唔好，間唔中會見到有啲人個樣「定咗格」，但又無影響佢繼續發言；有時咁啱定格嗰吓佢面容扭曲，但把聲又不斷講緊嘢，場面真係好滑稽，令人忍唔住想笑，仲好想cap低佢個樣。

「靜音好過」，唔知點解每開兩三次Zoom會，總會有一次其中一個與會者屋企樓上或樓下喺度裝修，又揼嘢又鑽嘢咁，而呢啲高頻噪音特別入咪，真係令人好鬼煩躁，開開吓好彩有人頂唔順，要求𠴱位仁兄唔講嘢時開靜音，大家即時舒服晒！

大家如果有其他Zoom嘅見聞或使用上嘅問題，歡迎留言分享。

保寶達人 – 為您八盡保險天下事
更多保寶達人手記Click Here