遙距簽單再升級 睇吓新增邊類保單？

面對愈來愈嚴峻嘅新冠肺炎疫情，而家各行各業都好需要正能量同鼓勵，咁今次保寶達人就為大家帶嚟兩個好消息，為各位保險人打打氣啦！

之前嗰篇保險界一條心曾經預告過，保寶達人收到風保監局容許QDAP（合資格延期年金保單）同VHIS（自願醫保）遙距簽單，只係抗疫措施嘅第一階段，果然保監局上星期五就宣布第二階段臨時便利措施，喺今年上半年（6月30日或之前）擴大非親身銷售方式分銷嘅保險產品種類，除咗QDAP同VHIS外，即日起連定期人壽保險保單、住院現金、醫療、危疾、個人意外、殘疾同長期護理保障嘅保費回贈保單或可續保保單都可以。至於對客戶簽名嘅要求，就繼續容許透過郵遞、電子簽名、現場錄音或錄影、個人身份識別碼核實及一次性密碼等進行。

第二階段優惠料陸續推出

面對疫情，整個業界都一條心，所以業界都好快有行動，當首階段遙距簽單措施一出，各保險公司都推出相關遙距投保平台同專屬產品優惠，相信好快第二階段嘅優惠都會陸續推出，各位Agent可以積極向客戶推介。

至於另一個好消息呢，其實保寶達人就覺得好壞參半。3月中保監局公布2019年香港保險業臨時統計數字，簡單嚟講係受到上年下半年社會事件衝擊，經濟喺不明朗因素籠罩下，都保持有增長，整年毛保費總額達到5,802億元（港元，下同），比2018年上升9.1%。而2019年長期業務嘅保費收入總額，按年上升9.7%至5,246億元，至於長期業務（不包括退休計劃業務）新造保單保費則為1,727億元，按年上升6.5%。

團結一致定能收復失地

大家都知上年因為上半年「好天斬埋落雨柴」，所以先抵銷到下半年嘅衝擊，雖然無以往年年雙位數字嘅增幅，不過有增長總好過無。至於2020年預計就會相當困難喇，特別係內地生意，上年由內地訪客帶來嘅長期業務新造保單保費有433.8億元，已經按年跌8.8%。而上年第4季數字就更加跌到得74億元，連續兩季跌超過20％。2020年第一季爆發新冠肺炎疫情後，形勢只會更加嚴峻。

不過香港人出名逆境適應力強，從谷底反彈又夠快。雖然今年上半年肯定會相當難捱，但大家要有信心，只要社會各界能夠團結一致戰勝疫情，下半年一定可以收復失地嘅！

保寶達人 – 為您八盡保險天下事

更多保寶達人手記Click Here