保費徵費年年加 徵費原因話你知

唔知大家知唔知,最近保費徵費又「靜悄悄」地加咗價?由今年4月1日開始,保費徵費率調整到每保單年度保費0.085%,人壽保單上限$60,一般保險就最多收$4,250。

其實保監局作為一個獨立嘅監管機構,要自負盈虧都好合理。保監局自從2017年6月接替屬政府部門嘅保險業監理處規管工作,上年9月再接手規管保險中介人之後,保監局已經完全接手本地保險規管事宜。工作多咗咁多,保費徵費要加都好正常,咁樣先可以維持日常運作。而事實上,保監局根據《保險業條例》,除咗可以向保單持有人按保費收取徵費之外,仲可以向保險公司收取授權費或年費,以及向特定服務使用者收取費用,以應付運作所需。

 

保監局今年度或有赤字

 

不過上年年底,市場已經有報道指保監局出現入不敷支嘅情況,經估算預計該局2020年度會有赤字,甚至可能持續幾年,因此要向政府提出撥款申請注資。保寶達人估計,其實保監局喺2015年底已經組班,但2018年先正式開始徵費,有兩年係完全無收入,而咁啱呢幾年正正係保險業發展得最快嘅時候,所以都收少咗好多。

 

疫市影響收入宜量入為出

 

既然保監局嘅收入同行業係咪好景息息相關,而家正值新冠肺炎疫情搞到個市停晒,就算徵費加咗,保監局今年嘅收入都有可能不升反跌。據保寶達人所知,由於之前部署接手中介人監管,保監局過去一、兩年積極招兵買馬,加上新成立要積極落廣告宣傳,相關支出的確唔少。但要再過多一年,先可以開始保費徵費第四階段(亦係最後階段)收0.1%,睇嚟保監局今年都要量入為出先得喇。