可以預支佣金花紅? 各保險公司出招支援Agent

保寶達人成日叫行家要「好天斬埋落雨柴」,好景嘅時候唔好亂咁揮霍,要識得積穀防饑,為意想唔到嘅逆境做準備。果然今次「疫」境就係史無前例地影響各行各業,令到唔少Agent叫苦連天。雖然疫情總會過去,但對於家庭開支唔少,例如要供樓又要養車嘅行家嚟講,捱唔捱到落去都成問題,好彩有保險公司相繼出招,幫有財政周轉需要嘅Agent度過難關。

幫助Agent維持業務

 

有保險公司就諗計幫Agent做生意,推出免費新冠股炎保障,吸引數以萬計市民登記,之後就提供高折扣買危疾保優惠,吸納咗呢班新客成為新客源後,再俾Agent「跟進」,之後簽唔簽到單就靠Agent自己喇!

 

因應保監局公布嘅「期間限定」遙距銷售安排,亦有好多保險公司相應簡化咗佢哋嘅網上平台投保,令更多保險業務都可以直接網上投保,唔使親身見客,連郵寄保單文件簽名都慳返,聽講MPF同醫療類保單反應都唔錯。

 

入行冇耐啱啱先站穩陣腳嗰班新晉Agent,受疫情衝擊特別大,如果Non-finance(即係無底薪)嗰啲,真係手停口停,不過有Finance可能仲愁,因為疫情下唔知點樣先Meet到Min Target,有啲公司規定如果連續幾個月都達唔到最低要求,就算冇俾人Term,而家個Package都未必保得住。有保險公司算係通情達理,之前業績穩定嘅Agent,如果係疫情期間唔夠數,例如3至6月,都唔會「踢Package」。

 

貸款借糧出Bonus招數盡出

 

不過講到最實際嘅支援,就梗係「真金白銀」啦!保寶達人收到風,有保險公司推出唔同形式嘅低息貸款或「借糧」安排,支援有需要嘅Agent。先講低息貸款,有間大公司嘅Agent可借到自僱人士MPF戶口權益最高7成,年息只係2厘,去到年尾先需要還款,到時還唔到公司先會扣Bonus及提高息率。另一間大公司同樣有低息貸款,但只借到月薪一半,上限8萬,另外提早發放保單續保Bonus,聽講有啲Agent仲已經出到2021年3月,至於平日條數唔錯嘅MDRT,仲可以申請提前出全年MDRT Bonus到7月。

 

不過「借定唔借?還得到先好借」,Agent預咗之後要加倍努力跑數,但有公司嘅財政Support,總好過要借出面嘅高息財仔嘅。

 

保寶達人 – 為您八盡保險天下事

更多保寶達人手記Click Here