失業潮係招募新人好機會 但要留意一件事

限聚令放寬後，終於同班保險大隊長唔使再Zoom來又Zoom去，可以親身打探行內八卦。當保寶達人提到最新政府公布數字話香港有超過20萬人失業，對於一般打工仔嚟講當然唔係好事，但係班大隊長就有唔同睇法。

佢哋覺得愈來愈多打工仔開始「醒覺」，每日用時間同勞力換取固定嘅收入，營營役役咁長遠唔係辦法，因為份工可以話無就無，令佢哋想加入更有長遠發展前景，而且喺逆境亦會不斷請人嘅行業；另外今次疫情仲令到打工仔體驗到「在家工作」嗰種自由嘅感覺，而保險正正就係逆境都仲會請人，工作時間由自己話事嘅行業，所以吸引到唔少有豐富工作經驗嘅新血。

企業自行培訓 Trainer轉戰保險

有大隊長就爆料，有一個同保險有啲關係嘅行業，最近多咗人加入保險代理團隊，講緊係培訓行業，呢班Trainer以往靠教培訓課程同接企業Training Job，但對上幾個月生意冰封，啲企業傾向自己做返培訓，於是呢班Trainer惟有面對現實「馬死落地行」，咁啱佢哋同保險公司一向有聯繫，於是加入保險業可以話係順理成章，而且佢哋本身人脈都算廣，有啲甚至係資深保險人嘅第二代，做保險都有優勢。

不過，當然唔係個個都成功入到行啦！有大隊長就呻，好似疫情重災區零售業就有唔少Sales無工開，佢哋都有興趣做保險。以前就梗係無任歡迎啦，但而家就要問吓學歷先，因為上年9月起攞牌最少要DSE 5科合格或同等學歷，即係中英文是但一科肥佬都無所謂，數學唔合格先係問題。

報考IGCSE 數學易過關

想「跨過」數學呢一關，有大隊長就推薦IGCSE（國際普通中學教育文憑試）考試，報精讀班再報考數學一科，因為IGCSE喺香港一年有兩次考試，唔使等好耐，而且考試難度一般比DSE易。IGCSE前身係以前嘅GCE O-Level，即係英國嘅中學會考，香港考試及評核局都認可IGCSE成績，以中英文科為例，IGCSE攞到合格就等同中學會考合格，所以如果攞到數學科合格成績，相信都有機會過到保監局嗰關。

除咗個人補考有關學科之外，其實唔少保險協會同教育團體亦已經籌備緊一啲進修課程，俾一啲學歷未夠或好早加入行業嘅行家修讀，希望好快有好消息啦！

保寶達人 – 為您八盡保險天下事

更多保寶達人手記Click Here