您今年儲夠CPD未呀？ 即睇最新CPD寬限期安排懶人包
近期疫情雖然受控，但大家都唔敢掉以輕心，好似保監局前日就宣布再延長遙距投保臨時安排多3個月，去到今年9月30日，等大家可以繼續用遙距方式做生意。除此之外，其實保監局仲針對保險中介人嘅持續專業培訓（CPD）要求推出寬限期安排，但相信呢樣唔係好多保險人知，咁就等保寶達人幫大家整理懶人包啦！
保監局了解到可能有部分持牌嘅保險中介人，因疫情影響難以喺原定限期前取得足夠CPD時數，所以公布以下3個重點安排，為個人持牌人提供更多時間同途徑嚟符合CPD規定：
1.合併兩個CPD評核期
第一個評核期：2019年9月23日至2020年7月31日
第二個評核期：2020年8月1日至2021年 7月31日
只要喺2021年7月31日或之前，拎到以上兩個評核期所需嘅總CPD時數就得（視乎幾時註冊，唔同持牌人嘅第一個評核期時數可能唔同，第二個評核期就一律10個時數），即第一個評核期拎唔夠鐘唔緊要，喺第二個評核期額外補返就得！
2.電子學習活動（E-Learning）時數上限提升
首兩個評核期，每期可申報電子學習活動時數上限由5小時增至7小時。
即係2021年 7月31日前，最多可以申報14個電子學習CPD時數，已經佔整體時數要求過半數！
3.網上虛擬課程方式獲得時數不設上限
以網上虛擬課程方式（如Microsoft Teams、Cisco Webex、Zoom等）進行嘅第1類合資格持續專業培訓活動（認可活動名單），可視作獲認可的CPD活動方式，不會歸類為電子學習活動，即無時數上限。
即係所有CPD時數都可以透過認可嘅網上虛擬課程獲取，以後喺公司或屋企上堂就得！
最後提提大家，CPD過渡期會喺2021年7月31日完結，到時由第3個評核期開始（2021年8月1日起），所有個人持牌人（除旅遊保險代理人外）嘅最低CPD時數要求都會加到每個評核期內最少15個時數，當中要包括最少3個同「道德或規例」有關嘅強制性CPD時數。
保寶達人 – 為您八盡保險天下事
更多保寶達人手記Click Here
