「港區國安法」引熱議 睇吓保險公司點回應?

今次講最近好多人談論嘅「港區國安法」,當然唔係討論政治立場啦,只係想講返俾大家知喺保險界有咩迴響。有一單新聞可能唔少行家都知,話說有一間大型保險公司高層率先表態支持國安法實施,引來業界熱烈討論。

高調表態反應各異

睇到呢間公司嘅新聞,有唔少朋友都有以下疑問:點解一間美資公司會咁表態?美國總公司點同「侵侵」交代呀?等保寶達人喺呢度一次過講清楚俾大家知,其實呢間公司一早已經同佢嘅「前」美國母公司分道揚鑣。當呢間保險公司喺10年前上市之後,已經成為一間獨立公司,以香港為總部;而喺上市兩年之後,嗰間美資公司就已經全數出售所持股份。所以唔好再以為呢間公司係美資喇,實情佢都標榜自己係一間香港公司。其實如果翻查歷史,更加會發現呢間公司101年前喺上海成立,「根」其實喺中國至真。

 

聽相熟嘅大隊長分享,對於呢間公司高調表態嘅決定,內部當然有唔同聲音,有人就反映即時有同客戶傾緊嘅單要煞停,冷靜期內嘅單甚至話要退保。但係另一方面,亦有一啲團隊要員對公司決定反應正面,覺得公司今次反應夠快,因為領先其他同業,對長遠拓展內地市場有好處咁話。

 

咁啱嘅係,呢間公司早排就公布獲銀保監批准,將上海分公司改為「子公司」,簡單嚟講係攞到全功能牌照,同其他中資保險公司一樣,可以申請喺內地開展更多保險業務,為佢哋內地市場嘅未來發展增加優勢。

 

內地市場不可或缺

睇返行業數據,近年保險業唔少生意都係靠中國內地市場,雖然今次疫情令內地生意停滯,但內地市場對各大保險公司仍然好重要。保寶達人就收到風,面對呢項敏感議題,有唔少保險公司尤其係外資背景嗰啲,都喺度內部評估緊究竟點樣作出回應。睇嚟之後仲會有好戲上演,保寶達人會為大家跟進報道。

 

保寶達人 – 為您八盡保險天下事

更多保寶達人手記Click Here