港業界發掘人才搏反彈 內地新興「保險直播主」

本地疫情又開始穩定,唔少人預期當限聚令放寬,保險業好有機會收復失地。好多見過風浪嘅大隊長更加認為,而家係難得嘅招聘良機。的確疫情期間唔少團隊都加入咗一啲生力軍。究竟根據呢班大隊長嘅經驗,去邊度發掘具潛質嘅人才最好呢?

做保險好靠人脈,好多團隊都鍾意吸納來自各行各業、有豐富工作經驗嘅人士。不過疫情發生之前,各行各業無風無浪,呢班人又點會諗到跳出「Comfort Zone」加入保險行業吖!正因為而家好多人覺得飯碗不保,不如試吓轉行做保險,或者考定個中介人牌照,作為副業都無壞,所以要說服佢哋轉跑道加入保險業,而家變得容易咗。

 

東涌成發掘新血熱點

保寶達人聽過一啲經理講,去以下兩個地方搵人會有意外驚喜。第一係東涌附近嘅酒吧/Cafe,因為航空業係今次疫情重災區,好多空姐空少都好得閒,成日圍埋吹水,其中唔少空姐一向都有經營「帶貨」副業,近排仲多咗時間去經營網店生意,所以佢哋嘅銷售技巧一啲都唔差;第二個地方就係美容院,早排停業開唔到,有唔少美容從業員都要放無薪假,有啲仲走去做「步兵」送外賣添,於是唔少幫襯開美容院嘅經理,都積極遊說佢哋轉做保險,皆因好多美容師都識得同人溝通,做事夠細心,服務客人好拿手,係好有條件做保險。

 

講起保險業招聘,有留意內地網購或者淘開寶嘅,都知內地吹緊一股「直播」風,但估唔到有間內地龍頭保險公司喺官方微博出咗一份招聘公告,話要用百萬年薪招募保險主播咁話,話唔定好快就會誕生保險界嘅薇婭同李佳琦。

 

「保險直播」潛在回報巨大

「保險直播」潛力有幾大?內地網購周不時有XX節,好似今個月18號就係「818理財節」,根據支付寶公布嘅數據顯示,理財節期間淘寶天貓舉辦近300場直播,其中包括咗6大保險公司專家、30位保險主播,以及近百個資深保險規劃師,佢哋做咗超過60場直播,營業額據聞有10幾億人民幣。

 

無可否認,網紅經濟係大勢所趨,保寶達人都覺得「保險直播」好有可能成為保險行業新嘅營銷方式,其實香港都有保險KOL/網紅,人數唔算多,未算係潮流。不過同其他消費性產品唔同,銷售理財保險產品一定要符合監管要求,保障用戶權益,所以保寶達人覺得「直播主」都係主要講吓保險知識、健康教育會好啲。

 

保寶達人 – 為您八盡保險天下事

更多保寶達人手記Click Here