無懼疫市入行 保險新人王之逆襲

有留意娛樂新聞嘅,應該知道近期有唔少新聞人物加入保險行業,例如有大律師背景,作風引人注目嘅年青才俊,亦有剛經歷離婚重新出發嘅獨立女性,報道話佢哋一入行就做出成績,仲成為所屬保險公司嘅「新人王」咁話。

擁有專業背景喺保險界發展係有優勢,例如保險條款同法律文件一樣唔容易理解,法律知識亦可以幫客戶解答生活上遇到嘅法律疑問。而且專業人士轉行通常經過深思熟慮,對經營自己嘅新事業特別認真,所以就算本身人脈網絡有番咁上下,都會好落力開拓新客源,希望盡快做出成績。所以通常有律師想入行,團隊係求之不得。

 

唔少傑出女性都經歷過婚姻觸礁,跨過困境創出成就,加上女性保險一向有市場,唔少事業型女性都無乜時間考慮自己同家人嘅保障需要,單親媽媽形象堅毅自強,加上擁有豐富嘅育兒心得同經驗,的確係能夠俾到女性客戶親切感同有用意見。

 

最近仲有兩個行業都有唔少人「疫」市入行。有大隊長話團隊最近加入咗唔少來自航空業嘅新血,由於唔少空中服務員要被迫放無薪假,收入大受影響,有唔少年資較淺嘅已經搵定後路。由於佢哋待客服務態度良好,外型亦唔錯,通常可以俾客戶唔錯嘅第一印象。

 

唔單止「空中」,有啲「地上」嘅工作亦被迫停頓。好似之前需要停業一段時間嘅美容院,亦有唔少美容師選擇轉行。有幫襯開美容院嘅大隊長,一向同美容師無所不談,而家甚至招攬埋佢哋入行,皆因好多美容師都好識得同人溝通,做事又夠細心,服務俾到人信心。

 

通常新人都希望可以「貼堂」,因為有「新人王」銜頭可以提升客戶嘅信心,啱啱入行,都會盡方法去碌親朋戚友人情牌,通常開到唔少細單,所以上到「最多保單」榜嘅機會大啲。講到尾,做保險係「細水長流」,一開始可以靠碌人情牌,加上初期通常會勤力啲博表現,但過咗新人時期,要保持成績就唔係咁容易喇,特別係要將「保單量」轉化為「佣金量」。希望一班「疫市」新人盡快學識點樣開拓新客源,繼續提升見客量同生意量,加上一路進修保險專業知識,之後喺行業持續攞到好成績啦!

 

保寶達人 – 為您八盡保險天下事

更多保寶達人手記Click Here