你開咗Signal同MeWe未?保險人的社媒兩難

早排WhatsApp更新用戶私隱條款引起好多爭議,唔少用戶都揚言「轉會」用其他通訊同社交平台,連Tesla CEO馬斯克都出PO撐轉會Signal,另外「脫FB」潮亦繼續發酵,唔少人同機構都紛紛申請MeWe平台,甚至一度搞到平台死機。

根據Digital Report 2020報告,香港人平均每人擁有接近9(8.8)個社交媒體帳戶,即係除咗最常用嘅WhatAapp、FB、IG、WeChat之外,仲有其他而且唔少,其實咁已顯示香港人多數鐘意「跟風」試玩新興社交平台,所以相信今次所謂「移民潮」,都係開多個新平台試用居多,真正「移民」者少。

 

講開轉會,唔少保險人都面對轉唔轉會嘅兩難局面。保險人用社交媒體,除咗係用來通訊,仲係工作同宣傳嘅平台。先講工作,Agent要全天候同客戶溝通同提供服務,即時通訊App嘅使用率非常高,但佢哋邊有得揀用邊種工具吖,客戶用乜就用乜,而且WhatsApp喺香港普及率實在太高,所以講得出「已Del WhatsApp同FB,之後轉去Signal同MeWe傾」嘅,基本上無乜可能係保險人。

 

至於宣傳,Agent目標係建立個人事業,需要Sell個人品牌同服務,部分可以分享生活動態嘅社交媒體平台,當然要好好咁利用來吸引客戶同招聘新人,呢啲已經係好平常,尤其疫情爆發前,內地客戶來港投保好盛行,當時十個保險人,九個半都活躍喺微信/WeChat平台,嗰啲滿滿嘅正能量同優越生活寫照,真係令人目不暇給。

 

其實保寶達人想表達嘅係,現代人實在太依賴即時通訊同社交平台,將自己嘅大量資訊放晒上網,而當一個平台或App愈來愈受歡迎,間公司就要請更多員工同提升設備,呢啲樣樣都係錢,但個個用戶都唔想付費,又唔要有廣告喎。世界邊有免費午餐,既然大數據年代客戶資料好值錢,賣數據就變得順理成章。睇返WhatsApp當年咪又係標榜免費同無廣告,「養大」咗成為金蛋後,就吸引Facebook高價收購。計我話,羊毛出在羊身上,將來難保Signal同MeWe唔會走上同一條路。

 

保寶達人 – 為您八盡保險天下事

更多保寶達人手記Click Here