你儲夠鐘數未?CPD急救班幫到你!

疫情之下,監管機構推出咗唔少保險行業嘅臨時便利措施,其中有一樣比較少人留意,但其實影響好多中介人飯碗嘅,就係持續專業培訓(CPD)時數要求寬限期安排。2021年好快過咗一半,唔覺唔覺已經好接近「截數」(鐘數)條死線,如果有行家到而家都仲係懵懵吓,唔知我喺度講緊乜,咁就真係大鑊喇!

疫情下,唔少實體CPD進修活動開唔到,所以上年保監局經已推出寬限期安排,將兩個CPD年度合併計算,第一個評核期由2019年9月23日至2020年7月31日,第二個評核期由2020年8月1日至2021年 7月31日,只要喺今年7月31日或之前,拎到以上兩個評核期所需嘅總CPD時數就得(視乎幾時註冊,唔同持牌人嘅第一個評核期時數可能唔同,第二個評核期就一律10個時數),原意係畀多啲時間從業員喺第二年追返啲鐘數。

 

疫情令唔少中介人生意受到影響,其中唔少屬於「邊緣Agent」,可能本身有正職,喺而家咁嘅環境,都唔知會唔會繼續做保險呢一行,但佢哋如果想繼續Keep住個牌,每年都要上堂儲CPD,大約10個時數左右,話多唔多,話少又唔少,但上堂要時間又要畀錢,於是心大心細,一路保持觀望,望吓望吓咁就限期將至喇。

 

保寶達人收到路邊社消息,話保監局有可能會將寬限期再一次延長,有傳係10月31日,即係多咗3個月時間來「救命」,不過傳聞今次呢條會係「最後的死線」,如果最後都係唔夠鐘數,就真係「無得傾」。小道消息仲話,只有已經拎到一定比例鐘數嘅從業員先可以有得再延長,大約係6至7成左右,即係話如果你連達到一半要求嘅CPD鐘數都未有,呢次3個月最後寬限期係無你份!可能面臨被DQ!因為根據中介人監管條例,個人持牌人如果無遵守CPD規定,保監局可能會採取紀律行動,甚至可能「釘牌」。

 

不過咁,如果只係爭幾個鐘頭,可以即刻搵吓有乜院校同協會仲有提供CPD課程同活動,好似保協之前就開辦咗唔少網上CPD班,反應非常之踴躍,相信係因為有好多中介人都醒起要急起直追,嚟緊保協仲會開辦最後一批「急救班」,話「救得一個得一個」,仲爭少少嘅行家,今次真係要把握機會喇!

 

保寶達人最後提提大家,根據保監局公布咗嘅框架,CPD過渡期會喺2021年7月31日完結,到時由第3個評核期開始(2021年8月1日起),所有個人持牌人(除咗旅遊保險代理人外)嘅最低CPD時數要求都會加到每個評核期內最少15個時數,當中要包括最少3個同「道德或規例」有關嘅強制性CPD時數。即係話,之後嗰一年要「儲夠鐘」就更加要勤力啲,「臨急抱佛腳」未必行得通喇!

 

保寶達人 – 為您八盡保險天下事

更多保寶達人手記Click Here