【考考你】香港有幾多間保險公司?邊間公司強制唔准接新生意?

考考大家,知唔知香港一共有幾多間保險公司呢?平日大家聽過嗰啲保險公司名,最多咪廿零間左右,但原來香港一共係有成165間獲授權保險公司(截至2021年3月31日),其中92間經營一般業務、53間經營長期業務、其餘20間就經營綜合業務。香港嘅保險公司數目用人口比例計,唔單止比中國內地高,更相信係全世界比例最高之一。

既然有咁多保險公司,有良莠不齊嘅情況自然都好平常。其實有啲小型保險公司結業一啲都唔出奇,只不過呢啲公司規模好細,通常唔會點報道,加上近年有唔少網上保險公司面世,所以保險公司總數近年大約都維持喺160間左右。

 

唔知有無行家有留意,有一間都少有名氣嘅保險公司,今年2月就傳因賣盤觸礁又未搵到新潛在買家,被保監局下令要停接新生意。最初係由2月8日起停接新保單3個月,期滿後又延長到7月31日,到咗8月間公司又再宣布延長至少2個月,睇嚟同呢個新買家可能仲有排傾。

 

有保險大隊長就認為,從呢件事可以睇到保監局好注重保險公司嘅償債比率(Solvency Ratio)。保監局一直密切監察所有獲授權保險公司嘅償付準備金水平,以保障投保人的利益,底線大約係150%左右,如果有保險公司低過呢條線,就有可能被禁止接新單。

 

又好似早一兩年,有一種俗稱2Pay5嘅短期儲蓄保險突然間好賣得,喺街站成日都會見到相關宣傳,有啲甚至保證息率開到3.5厘。其實保監局都好關注,因為賣得太多呢類產品,對間公司相當不利,因為有一啲中小型公司為咗拉高派息吸引客戶,可能會投資BBB以下級別嘅企業債券,無錯係高息,但違約風險都高啲,如果間公司真係違約,對保險公司營運就會有好大問題,特別係賣好多高保證回報產品嘅公司。

 

對所有監管機構嚟講,預防永遠勝於治療。停接新保單,係畀時間你傾新買家,叫停2Pay5,亦係呼籲業界睇實風險。保監咁做唔會過份監管,但又不會太鬆引致風險,所以香港保險業先可以健康發展。

 

保寶達人 – 為您八盡保險天下事

更多保寶達人手記Click Here