【保寶達人】天氣熱到爆 保險人應該點樣Dress？

相信大家都知上個月（7月）天氣非常之熱，但又知唔知原來天文台一共發出咗21日嘅酷熱天氣警告，計返有超過500小時嘅30幾40度高溫天氣！一般人出街就算著T恤短褲都熱到汗流浹背，如果返工要著西裝點頂？大熱天時「跑街」真係隨時中暑！

香港有唔少需要見客嘅行業，為咗展示專業形象，都會要求員工「全天候」著全套西裝返工，保險從業員就係其中之一。保險人見客要著Suits，已經係根深蒂固嘅價值觀，好多資深嘅大隊長都規定團隊要著西裝打呔返工。

呢種「限衣令」反應相當兩極，有人認為保險行業要著西裝無可厚非，只能夠「頂硬上」，最多喺街就除低西裝外套，返公司先著返，但亦有人反駁，全天候強制著西裝好唔人道，只係自我感覺良好，因為而家呢種天氣唔著西裝，根本無人會怪你。

的確時代唔同咗，越來越多公司彈性容許員工根據天氣同場合調整衣著要求，例如Business Casual同Smart Casual都好普遍，甚至唔少保險公司高層，喺相對Casual嘅公司活動上面，都開始「以身作則」，以Business Casual上陣。

保寶達人問過啲大隊長，其實近年保險業對從業員衣著要求，已經比以前寬鬆好多，已經好少要求Full Gear。有大隊長就覺得，後生嗰班同事本來就唔太習慣著西裝同打呔，如果畀到彈性佢哋著衫，同差唔多年紀嘅客戶打交道時，可以唔使咁拘謹。當然大家都明如果係參加晚宴或者頒獎禮呢啲隆重場合，Formal Dressing仍然係必須啦！

「先敬羅衣後敬人」係無錯，好多時衣著會影響見客第一印象，所以頭幾次見面應該要執得正啲，但係好多時熟絡咗之後，能夠畀到客戶信心嘅，其實係保險從業員嘅專業知識同服務態度至真。

大家又覺得而家咁嘅天氣，保險人應該點著？或者大家有乜降溫奇招？

保寶達人 – 為您八盡保險天下事

更多保寶達人手記Click Here