【保寶達人】你DD？我DD！總監職銜唔簡單

「你DD？」、「我DD！」、「佢都係DD！」，DD代表一個保險行內嘅成功標誌──「區域總監」（District Director），所以叫得做DD嘅，手下點都有返一百幾十人，再升上去嘅SDD甚至EDD，旗下家族甚至有過千人都唔出奇！

雖然各大寶號都大致沿用DD職級，但係成為DD嘅要求都有啲唔同，不同公司都有自己嘅晉升階梯，有可能一啲District Manager就等於其他公司嘅DD都唔定。呢啲係保險行業職銜嘅微妙分別，日常工作就唔會有大問題嘅，但係有啲業界活動，講到明要DD或者以上先可以參加。

好似最近保協成立一個叫「總監會」（The Directors’ Club）嘅組織，邀請各保險公司嘅總監成為會員，提供總監專用熱線、申請牌照支援、免費法律援助等服務，亦會提供好似「黑卡」咁嘅貴賓級福利，好似酒店同高級會所預訂優惠之類。

其實保協呢個「總監會」提供嘅貴賓級福利，可能對於一啲資深DD嚟講只係小意思，背後嘅深層次意義先至重要。保協希望構建一個平台，加強唔同公司嘅DD與DD之間嘅互動同交流，因為DD作為業界領袖，有助滙聚業界嘅意見，等保協更加精準咁將同業意見向政府有關當局反映。

如果有更多DD加入，「總監會」能夠發揮出真正功效，咁DD就唔單止係一個事業有成嘅象徵，仲可以係代表喺行業有承擔、有貢獻嘅領袖級人物。

保寶達人 – 為您八盡保險天下事

更多保寶達人手記Click Here