【保寶達人】投連戰記 – ILAS產品勢掀反擊戰？

上月底保監局公布上半年保險業數據，其中投資相連業務上半年嘅新造保單保費錄得85億港元，雖然佔整體長期業務保單保費只係1成左右，但亦係一個不容忽視嘅市場。

過往差唔多十年，呢類「投資相連壽險計劃」（ILAS）都係屬於保險公司獨家提供。資歷比較淺嘅行家可能唔知，ILAS之所以喺銀行「絕跡」多年，其實並唔係監管機構唔畀銀行賣，而係金管局早年曾經發出銷售指引，一眾銀行覺得太嚴格，衡量之後決定退出市場，不過呢個局面最近就有新突破。

證監會（SFC）喺上年底發布咗ILAS嘅附加指引，保監局隨即公布相關釋義文件，引入全新包括高額人壽保障嘅「保障型投資相連壽險」（Protection Linked Plans，PLP）投連險類別，唔少大隊長都覺得呢個係銀行重返ILAS市場嘅前兆。

果然到咗今年7月初，金管局（HKMA）向銀行發出通告，就銷售PLP提供指引，即係話只要符合相關監管要求，將會再有ILAS產品可以透過銀行渠道銷售。

睇嚟今次銀行勢掀ILAS反擊戰，保寶達人就聽聞喺今次ILAS新規例諮詢過程當中，有一間大型銀行相當之落力，香港大型銀行一隻手都數得出，究竟係邊間呢？

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。