【保寶達人】ILAS過渡期4月底屆滿 PLP新產品欠推力難成氣候

投資相連保險(ILAS)改革就快進入直路,相信有啲保險公司正喺度密鑼緊鼓準備自家PLP新產品,因為現有ILAS產品嘅過渡期將會喺今年4月30日屆滿,據聞今次點都冇得再延長,代表ILAS即將正式踏入PLP新時代。

 

雖然就快到Deadline,但如果有保險公司喺最後嗰幾日先提交產品,由於審批都要一段時間,基於保障香港市民嘅利益,保險公司好應該提供更多元化產品選擇,咁既然PLP新產品仲未審核完,咁舊產品係咪都可以繼續賣住先呢?

 

有公司漏夜趕科場,亦有公司選擇「嘆慢板」,就算旗下PLP產品一早審批完成,一啲都唔急住推出市場,或者淨係上晒啲Lump Sum Plan,Regular Plan就唔上住。按呢個趨勢咁落去,如果保險公司唔太積極提供所謂列表式嘅產品,貨架將會少咗嘢,對消費者亦會有影響。

 

雖然產品已經Ready,但係市場推廣呢啲商業策略係由保險公司決定,新貨品唔上架都無辦法。歸根究底,根據而家監管機構對PLP產品嘅要求,真係無乜銷售渠道可以驅使Agent團隊會好積極去推售。

 

講真推出PLP原意係好,但係隻產品嘅定位本身都值得商榷,你要個廿幾三十歲嘅年輕人,而家買張150%人壽保險單,但佢目標其實係做saving加投資。好似有間大銀行雖然一早出咗PLP,飲飽晒頭啖湯,但係據聞市場反應都係麻麻。

 

每當有新類型保險產品推出市場,需要成個行業去配合,特別喺市場推廣方面出力,先至可以營造到個勢,吸引市民留意同去了解。睇返而家,保險公司對PLP普遍興致缺缺,再遲啲連舊ILAS產品又唔賣得,到頭來結果香港市民喺ILAS方面嘅產品選擇反而少咗,究竟咁樣係咪啱呢?

 

保寶達人 – 為您八盡保險天下事

更多保寶達人手記Click Here

 

任何於本文章的評論或意見純屬來自個別嘉賓/隊長等,並未代表保協之立場。