【保寶達人】ChatGPT衝擊保險行業！邊類工種有機會失業？

最近無論去到任何一個商業場合，大家都會講ChatGPT。呢個人工智能服務推出短短幾個月立即全球爆紅，只係初步開放畀幾個地區用，用戶數量已經超過1億人。聽人講，ChatGPT十分勁揪，連考法律試、寫程式呢啲專業領域都難唔到佢，咁佢對保險業又有乜影響呢？

坦白講，而家談論ChatGPT嘅人多，真係去申請用嘅只係好少，因為暫時香港仲未係服務範圍內，需要用一啲辦法先用到。用過嘅大隊長就覺得，保險公司部分後勤服務崗位真係有機會被AI取代。的確，唔少保險公司都加速推進AI技術喺理賠服務方面嘅應用，用來提升理賠效率同優化客戶服務，好似保險公司應用聊天機械人（Chatbot）就已經唔係咩新鮮事。

如果保險公司升級用功能更加進階，好似ChatGPT咁識得模擬真人咁同客戶對話嘅AI服務，加上有辦法用大量關於保險產品嘅知識，包括銷售、核保、理賠等不同場景嘅使用者對話內容去訓練佢，不斷提升AI對保險相關知識嘅理解同生成內容嘅準確性，對保險公司客服人員可能真係一個危機！

至於保險Agent又點呢？只要用過ChatGPT就會知，喺保險銷售呢種比較需要專門知識同待人接物技巧嘅工作，暫時人工智能仲未可以好似一個專業嘅Agent咁，幫客戶分析投保需要同建議方案。如果問佢有關買保險嘅問題，AI主要係靠Common Sense去答，如果再問得深入同專業啲嘅話，佢就會「頭頭是道」咁亂咁答，好多時都唔係正確嘅內容。

保險關乎人生保障，大部分客戶都傾向有真人服務，如果係長者客戶，要佢哋使用網上服務就更加困難。而最重要嘅一點係，Agent喺幫客戶處理有關保險嘅問題時，需要提供個人化建議同服務之外，好多時仲涉及埋同理心，好似客戶有急病要介紹醫生，或者客戶或佢屋企人出事需要索償，成個服務過程都要照顧到客戶嘅情緒。呢種真正人性化嘅溝通同交流，現階段嘅AI技術休仲未做得到。

總括來講，現階段AI有可能取代一些重複性嘅工種，例如代替客戶服務人員解答簡單查詢，分析客戶資料加快核保同理賠之類，但相信一段時間內都取代唔到保險Agent「以人為本」嘅顧問服務。咁大家可以放心啦！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。