數碼時代：真人服務重唔重要？

相信唔少朋友可能都聽過，身邊嘅朋友話買保險好麻煩，要搵agent傾、等佢覆機，又要約時間見面先搞得掂。但其實依家啲保險公司都好緊貼潮流，利用網上平台、AI科技令投保同理賠過程變得好方便。

最近保監局行政總監張雲正喺出席論壇活動嗰陣，亦都認同AI喺吸納客戶、保單核保、顧客服務、申索理賠，以及偵測詐騙等方面是一樣可以帶嚟正面效果嘅強大工具。不過佢都提醒話，AI雖然勁，都要有人監察先得，仲話保監局會落實一個穩健而具彈性嘅監管框架，推動公平、透明同符合道德咁應用AI。所以我就覺得，保險公司同從業員喺應用AI嗰陣，除咗考慮便利程度同成本效益，真係要記住好好考慮客戶嘅利益同感受。

講返轉頭，而家好多保險公司都積極優化網上平台，入面仲加入AI元素，等大家查保單、改資料、搞理賠唔止可以喺部手機度搞掂，仲有好多提醒同貼士，等你知道自己嘅保障夠唔夠，需唔需要加保，隨時掌握自己嘅保障狀況。

講真，保險唔係買咗就算，因為人生每個階段嘅需求都唔同。好似你未結婚嗰陣可能淨係買醫保，結咗婚之後可能要諗下人壽保險，有咗小朋友之後又要諗教育基金。有咗呢啲咁方便嘅平台，你可以好容易就睇到而家啲保單夠唔夠自己嘅需要。仲有一個好處，就係你可以知道自己啲保單有冇咩變動，例如保費係咪已經交咗，避免大頭蝦唔記得交保費而令保單失效。

當然講到尾，科技發展咁快，我哋都要問下自己：究竟科技係咪真係可以解決晒所有問題？當我哋享受緊科技帶來嘅方便時，保險業以「人」為本嘅本質──從業員貼心嘅服務係咪變得唔再重要？點樣先可以真正平衡到科技發展同人性化服務？

好似前面提到，即使有好嘅平台等你方便了解保單資訊，但原來你平時都唔會打開個App或上網睇，又或者收到保險公司電郵又唔睇，咁就算AI功能再勁，都解決唔到相關問題。就好似你有部超級跑車，但係你都唔揸，放咗喺車房生晒塵，咁又有咩意思呢？倒不如搵返個司機或者管家幫你打理好過啦！

不過話分兩頭，雖然AI、科技未必可以完全取代保險從業員，但咁唔代表大家可以漠視佢嘅存在。AI可以幫手提升工作效率係不爭嘅事實，所以識得用AI嘅從業員，某程度上一定比唔識用嘅有優勢，唔好計可以幫你提升幾多效率，至少同客傾偈都多個話題先丫，係咪？

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。