一件百搭Tee，係咪夠著成世？

相信唔少人打開個衣櫃，總會有嗰一兩件百搭嘅白Tee、牛仔褲。又舒服又好襯，基本上八成嘅日常場合都搞得掂。自願醫保計劃（VHIS）推出咗咁耐，就好似呢啲「百搭item」，價錢親民又實用，已經係好多香港人「保障衣櫃」入面嘅基本款。但問題嚟喇，齋靠一件百搭Tee，係咪真係夠頂得住人生所有突如其來嘅「場合」呢？

我哋可以將最基本嗰份自願醫保標準計劃，當係嗰件我哋最鍾意著嘅百搭Tee。佢價錢唔貴，應付平時啲「普通場合」（例如傷風感冒、做個小檢查）就綽綽有餘，等我哋有需要時唔會「冇衫著」咁尷尬。不過，人生流流長，總會遇到啲要「盛裝出席」嘅大場面。同樣道理，當健康唔好彩，遇到好似「癌症治療」或者「心臟手術」呢啲需要更多醫療支援嘅「大場合」時，我哋就會發現齋靠件Tee嗰少少「布仔」（保障額），根本就擋唔住個財務需要。

咁高端醫保又似咩呢？佢就好似一套度身訂造嘅Tuxedo，或者係一件打風落雨都唔怕嘅防水透氣風褸。用料靚、夠專業，確保我哋喺最關鍵、最重要嘅時候，都仲可以好體面，得到最好嘅保護。不過，一套Tuxedo唔平，高端計劃嘅保費都令好多人卻步，覺得「未必用得著，買咗好嘥」。

咁係咪代表我哋一定要喺「白Tee」同「重本買禮服」之間二揀一？梗係唔係啦。真正識著衫嘅人，最叻就係玩「Layering」（層次配搭）。有保險大隊長教路，大家可以將公司份團體醫保（Group Med），當係件貼身嘅「打底衫」，應付日常小問題。然後，再幫自己加一份有「墊底費」嘅高端醫保——咁就好似喺衣櫃入面，一早準備定嗰件價格相宜啲嘅風褸。平時天氣好，著件Tee就夠；一旦天氣報告話就嚟打風（預計有大筆醫療開支），我哋只需要交俾件專業「風褸」去頂。呢個「洋蔥式著衫法」，就可以用一個負擔到嘅成本，換到頂級嘅裝備。

所以講到最後，大家都要定期打開自己個「健康衣櫃」執一執。一件百搭Tee係必需嘅基本嘢，但一個真正準備充足嘅衣櫃，一定會有返件「戰衣」，等你有信心去應付各種「大場面」！你個健康衣櫃入面，又係咪已經準備好可以應付任何場合嘅衫呢？

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。