10個睇完6個like？跨境養老有吸引力？

人口老齡化令愈嚟愈多人關注養老問題。早排出席一個聚會，聽到有保險從業員討論跨區養老嘅話題。席間有人提到，好多客戶都希望年老時可以住得舒適安逸，有地方食飯、參與活動，需要時仲有醫護照顧。不過香港優質嘅安老院除咗價錢昂貴，仲要輪候時間特別長，所以唔少人已經開始考慮去大灣區搵更好嘅養老選擇。究竟呢個係大趨勢定係個別現象？係咪值得大家認真考慮呢？

喺香港，一個私營安老院嘅床位，每月動輒要八千至一萬蚊，但環境質素如何，相信大家從新聞報導都略有所知。有資深從業員指出，香港寸金尺土，加上生活成本高企，實在好難做到內地咁大規模同高規格嘅養老院。有見及此，特區政府早喺十年前已經推出「廣東院舍住宿照顧服務試驗計劃」（而家改名做「廣東院舍照顧服務計劃」），為等緊資助護理安老宿位，又有意返內地養老嘅長者，提供多一個資助服務選擇。而喺上年嘅施政報告仲提到，今年下半年會推出「綜合社會保障援助長者入住廣東院舍試驗計劃」，資助領取綜援嘅長者入住指定喺廣東省嘅安老院，不過暫時只有一千個名額。

相比之下，大灣區例如深圳、佛山、東莞嘅養老社區，環境之優質令人難以想像！以深圳某養老社區為例，一個包括一房一廳加露台嘅單位，連埋三餐、宵夜、麻將等娛樂活動，每月只需要大約九千蚊，性價比遠超香港。近年更加有唔少內地保險公司推出保險產品同養老服務掛鈎，客戶只要投保指定金額嘅保單，就可以獲得入住權，之後仲可以每月從保單抽錢支付住宿費用。該資深從業員表示，呢種方案唔止可以為客戶提供保障，仲可以滿足佢哋養老需求，令佢哋倍感安心。佢補充話有好多客戶喺五十幾歲已經買定份保單，攞咗個入住權，等到幾年後想入住嘅時候就可以直接從保單抽錢，咁就算子女工作繁忙或者想過獨立生活，長者都有一份保障。

另一位與會嘅從業員就分享話，呢種模式其實已經出現喺香港，有本地保險公司開始同內地養老社區合作，透過保單形式支付養老社區嘅費用。佢話呢啲公司通常會定期組織參觀團，帶香港客戶去大灣區實地考察養老社區，體驗膳食服務、參觀社區設施，加埋超市購物。如果參觀完有興趣投保及入住嘅客戶，返到香港之後就可以搵相關從業員跟進。而根據過去大半年嘅經驗，每十個參觀客戶就有六個表示有興趣，可以話開創咗一個新嘅商機！

雖然保險公司或團隊要為呢啲參觀活動提供補貼，但從成效嚟睇，呢種拋磚引玉嘅營銷方式確實好有吸引力。呢個做法唔止可以幫到從業員開拓業務，仲可以令香港市民更加了解內地養老嘅實際情況，及早做好保障規劃，可以話係一個多贏嘅局面。作為從業員或者市民大眾，你又點睇呢個發展趨勢呢？

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。