跨境養老政策升級  保險業迎接創新新機遇

特首李家超早排公布咗新一份施政報告，入面講咗唔少同保險業相關嘅內容，特別係跨境養老呢啲大家都關注嘅熱話。其實，早排專欄都有講過灣區養老嘅議題，而咁啱今次施政報告亦提到相關議題，都可以話係提醒大家要認真看待呢樣嘢。

講返重點，施政報告入面點樣推動灣區跨境養老？報告提出今年年底前推出試驗計劃，資助合資格綜援受助長者入住指定在粵安老院，每人每月獲得$5,000港元資助，名額1 ,000個。同時「廣東院舍照顧服務計劃」嘅院舍數量和覆蓋城市亦持續擴大。

呢啲新政策唔只改善長者嘅安老環境，更可以話間接擴大咗跨境醫療保障市場嘅潛力。有保險公司就明言樂見政府積極推動粵港澳大灣區嘅跨境醫療發展同完善跨境養老規劃。其實無論係保險公司，又或者係前線保險從業員都要思考下，點樣將跨境醫療保障加入產品當中，設計專門針對跨境養老需求嘅保障方案，咁先可以真正回應客戶嘅需要。

至於另一個值得講嘅重點，就係施政報告亦強調推動金融科技同保險科技創新，鼓勵業界利用大數據、智能分析等技術提升保障服務效率。加入新科技元素，除咗令行業運作更流暢，從業員更可以用智能工具提升銷售效率，同時整合個人化數據做產品推薦，增加成交機會同客戶黏性。大家可以諗諗點樣將科技應用落實到日常工作，做好產品差異化推廣。

雖然施政報告提出唔少有利保險業發展嘅方案，不過隨住客戶需求越趨多元化同高階，大家都要問問自己係咪已經做好準備迎接呢啲機遇。就好似掌握跨境醫療保障嘅條款同理賠流程就好重要，因為當客戶計劃跨境安老或者退休，大家需要清楚講解點樣享受到跨境醫療理賠，呢啲往往都係客戶做保障選擇嘅重要原因。

而保監局亦就住施政報告內容，表示會同業界探討有效方案，為使用內地醫療或護老服務，以及喺大灣區自駕遊嘅本港居民帶來便利，所以大家真係要密切留意事態發展。畢竟喺呢個新時代下，保險產品同銷售策略嘅創新變得尤其重要。無論係跨境養老、跨境醫療保障定係金融科技運用，都係我哋將來要抓緊機會嘅關鍵。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。