遊行示威時受傷 醫療保險有無得賠？

保險人tg group近來有個熱門話題，就係受保人如果係示威期間受傷而產生醫療費用，可唔可以claim返醫療保險？

要答呢個問題，活動嘅「定性」係好緊要。好多醫療保險都會將戰爭、恐怖襲擊、暴動等列為不保事項。舉個例子，6.12金鐘衝突中有個港台外判司機懷疑因催淚彈受傷，最初保險公司因當局稱有關事件為暴動，故屬不保事項而不賠，但之後當局進行澄清，所以保險公司亦受理索償申請。

不過，就算真係因暴動而受傷都唔一定無得賠嘅。好似自願醫保嘅不保事項條款中，就無提及遊行、示威、暴動、恐怖襲擊等，但就有明確指明不賠因「參與非法活動」而產生嘅醫療費用。照字面意思，如果參與已獲「不反對通知書」嘅合法遊行示威活動時受傷入院，以及之後嘅治療費用，應該都係有得賠。

但係，若遊行路綫或時間超過不反對通知書中嘅規定，或警方已示意「正參與非法集結」等情況，而投保人繼續參與，就真係有機會被解讀為「參與非法活動」，到時導致嘅醫療開支，保險公司就有權拒絕賠償。咁「行經非法活動現場時被波及而受傷」又點呢？如果證明到只係行過並無參與，即使示威活動屬於非法或者暴動，保險公司亦應該要賠償相關醫療費用。

如果真係有人不幸（真心希望唔好）係示威衝突中失去生命，咁就同人壽保險嘅身故賠償有關。人壽方面就相對簡單，不保事項通常只有短時間內自殺一項，即係保單生效或重新簽發嘅首一年或兩年內，如受保人自殺身亡，保險公司可拒絕賠償。

不過最後都要加番一條免責條款先，上面講嘅只係一般嘅處理情況，實際賠唔賠，係要睇返保單條款，由於唔同保險公司有可能對相關字眼有唔同詮釋，最終都係要視乎保險公司嘅決定。

保寶達人 – 為您八盡保險天下事

更多保寶達人手記Click Here