香港保險業蟬聯全球第一 市場轉向 點樣由「銷售」變「領航」？

近排同唔同保險公司嘅業界老友聚會，大家話題除咗係稅季最後衝刺，焦點一定離唔開香港喺最新一期《全球金融中心指數》（GFCI 39）入面嘅亮麗成績。香港唔單止重返全球第三、亞太第一，最令我哋保險從業員自豪嘅，相信係香港喺「保險業」分項排名入面，繼續蟬聯全球第一。

好多時大家睇排名，可能覺得只係一堆數字，但呢份「全球第一」嘅成績表，其實代表緊一個由技術驅動、監管完善，加上從業員專業質素交織而成嘅生態。

如果大家有留意3月初嘅新聞，保監局聯同其他金融監管機構推出「GenA.I. Sandbox++」。呢個唔係一個普通嘅技術測試，而係一個升級版嘅人工智慧沙盒。目標好清晰，就係要推動保險公司開發更精準嘅風險評估工具同自動化理賠服務。

相信唔少前綫同業都會認同，以前客戶搵你，可能係想了解產品條款；但隨住科技普及，客戶想要嘅係更個人化、更高效嘅分析同體驗。當 AI 開始處理自動化理賠，甚至幫公司做數據分析嘅時候，我哋同客戶溝通嘅空間反而大咗。我哋唔使再花大量時間喺啲重複性嘅行政流程上，而係可以將精力放喺更深層次嘅財務策劃同情感連結。科技唔係要取代人，而係要幫我哋將「專業」做得更厚。

面對愈嚟愈快嘅資訊流動同科技轉型，單打獨鬥其實幾吃力，所以近年唔少業界都積極參與行業活動，好似「保協」早排就搞咗個「保協總監會 2026 高峰專題研討」，現場就有唔少業界領袖同相關機構代表。喺研討會入面，大會邀請相關嘅專家，以專題深入探討，使同業學習行業中最新嘅變化。呢類活動嘅價值，唔係教大家直接嘅銷售秘訣，而在於提供一個高質素嘅平台，等大家可以喺日常忙碌嘅工作之外，了解多啲成個行業嘅大方向，繼而更好咁為自己或團隊規劃。

如果大家平時可以抽少少時間參與呢類業界活動，其實對成個行業係一件好事。身處一個「全球第一」嘅市場，資訊嘅流通同共識嘅建立好重要。如果唔同公司嘅精英坐埋一齊，討論點樣落實 GenA.I. 嘅負責任應用、點樣優化銷售操守，呢種brain storm方式，其實係推動緊香港保險業向新質生產力轉型。當大家都掌握到第一手行情，成個行業嘅質素自然會提升，最終受惠嘅亦係廣大客戶同我哋每一位從業員。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。