邊個話IANG簽證續期要年薪18萬？

上個月保監局出咗今年第1季嘅臨時統計數字，因為跨境人流限制持續，內地訪客業務繼續陷入寒冬，新造業務相關保費由2020年第一季嘅54億港元，收縮到今年同期得返約1億，插水式下跌成98.1%，絕對係史無前例！而所有內地訪客新業務，夾埋只係佔整體個人業務總額0.3%咋。

舊年成年都係咁嘅環境，以IANG為主嘅團隊，情況就最嚴峻。保寶達人聽講有啲團隊，成條Team有一半IANG經已返晒鄉下，幾時再返香港都唔知道，至於另外有一部分IANG走，就係因為收入大減，連「IANG簽證」續期都有困難，加上成年都見唔到內地嘅屋企人，於是就決定放棄剛剛起步嘅保險事業，返內地團聚好過。

講起IANG續期，好多人都以為年薪要求係18萬港元，除開即係每月1.5萬，但唔講唔知，其實入境處係無硬性規定最低入息要求，只係話要有「能夠維持生活」嘅收入，只不過因為唔少保險公司都用18萬作為一個比較穩陣過到關嘅要求，結果行家講得多，就個個都以為一定要18萬，不過香港生活指數咁高，入境處嘅要求都應該唔會相差太遠。

根據保寶達人打聽，今次最大影響係19至20年入行嗰班IANG，原本風光無限嘅內地訪客生意，因為前年社會事件同上年嘅疫情影響，由高峰一直滑落，呢班新人入行後仲未享受過成果，就要面對世紀疫情嘅巨大難關，真係幾唔好彩。

反而入行5年以上嘅IANG影響就小好多喇，話晒咁多年都已經算做站穩咗陣腳，過去一年靠本地人同「新香港人」生意都算搞得掂，又或者早幾年搵落唔少，好景時識得投資理財，買咗一兩個單位收租，仲有啲屋企叫做有啲錢，內地嘅父母喺香港幫佢買咗層樓，咁如果有樓收租，都係一個可維持生活收入嘅證明，同埋疫情期間入境處都表示會對IANG續期「酌情處理」，呢班人嘅續期問題相信唔大。

咁如果計極都仲係唔夠收入咁點算呢？保寶達人從路邊社聽聞，話有保險公司會選擇性咁向某啲IANG同事「預支」佣金，等佢哋過到收入呢一關，仲有啲自己屋企有條件嘅，就自己買公司嘅產品出糧畀自己，總之就各出奇謀啦！

不過有一啲「奇謀」保寶達人就唔係太建議喇。話說坊間有啲中介公司，專幫IANG提供協助申請「IANG簽證」嘅服務，即係用各種方法提供收入證明，等「客戶」可以成功過關。不過，之前就有報道話有中介公司涉嫌搵空殼公司造假僱傭合約、假出糧紀錄，呃入境處批出IANG簽證。如果間中介公司被捉到，個IANG客戶都可能要負上責任，所以都係腳踏實地搵工或者跑數，實際能夠達標最穩陣。

保寶達人 – 為您八盡保險天下事

更多保寶達人手記Click Here