保險業收入報喜　醫保問題待解決

最近有兩宗新聞幾值得關注，想同大家分享下。首先係個好消息：政府統計處話2024年保險業表現幾好，全年收益按年升咗12.2%，第四季仲勁啲，升咗成17.9%添，睇嚟行業開始穩步向好。至於第二宗新聞就唔算係好消息，反而係值得大家關注嘅醫療保險問題。

消委會最近做咗個調查，發現部分私家醫療收費唔夠透明，而有啲病人唔單止想用盡保險額，有時仲會比醫護人員游說去做多啲檢查，最後張醫療單嚇到人仰馬翻。呢個問題其實唔係咩新鮮事：就好似有人因為唔舒服去睇醫生，見到自己有醫保cover，就諗住「唔用就蝕」，叫醫生幫佢做埋啲可能唔係好需要嘅檢查。有時又可能係醫護人員知道病人有醫保，就順水推舟叫佢做多幾樣檢查，話咁先至最安全。點知最後張醫療單嚇到你瞓唔著！

睇落好似只係個別事件，但所謂積少成多，呢啲個案慢慢已經形成咗一個惡性循環：醫院收費透過度不足、病人濫用醫療服務，索償金額自然大增，保險公司冇計，唯有加保費。咁樣落去醫生、保險公司同病人呢個三角關係無可避免會愈嚟愈差。當醫療費年年升，保險公司被迫加保費，病人負擔愈嚟愈重，最後可能連醫保都買唔起，要靠公立醫院。香港人口老化嚟緊仲會更嚴重，公立醫院而家已經逼爆，如果連私營醫療系統都有問題，真係會出事！

其實，醫療保險本來係想大家齊齊分擔風險，而家有傾向變成咗「有保險就任性」嘅歪風。真係要講句：此風不可長！好在近年都有啲新希望，唔少保險公司開始搞「網絡醫生計劃」，即係同某啲醫療機構合作，仲會畀額外福利推介客戶去用，好似加大保額、出院免找數，甚至有無索償獎金等等，希望可以慢慢改善呢個情況。

講真要解決上述濫用問題，真係要各方面出力，好似醫院要清楚講明收費、保險公司要做好把關、病人都要理性啲使用醫療服務。咁先至可以令醫保更加公平穩定，唔使擔心保險池會爆煲。大家話係唔係？

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。