善用優勢  創造雙贏  「保協」前會長Queenie分享保險業機遇

前排喺一個「保協」聚會度，見到1998至99年度「保協」前會長陳鳳玲（Queenie）同業界同事分享咗佢對近年行業發展嘅睇法，我覺得值得同大家分享下。例如喺人工智能應用方面，Queenie表示：「保險從業員唔會被AI取代！」佢解釋指，保險業最核心嘅價值就係以人為本，好多客戶都希望搵到一個真人去解答佢哋嘅問題，同埋跟進後續服務，所以從業員一定有佢哋嘅價值。

雖然咁講，但佢都認同科技可以幫到從業員提升工作效率。佢話人工智能同創新科技可以幫大家簡化好多日常工作流程，等從業員可以減少文書工作，將更多時間放喺服務客戶度。另外，透過大數據分析，保險從業員亦都可以令客戶更了解自己嘅保障需求，所以大家好應該多啲時間去了解一下人工智能科技，睇吓點樣幫自己提升工作效率同埋服務表現，繼而從傳統銷售轉向資料分析同埋智能化服務。

另外，Queenie除咗擔任過「保協」會長，仲做過GAMAHK嘅會長。佢同大家分享話，近年見到有唔少女性投身保險行業，佢認為女性從業員喺保險行業其實有好多獨特優勢，例如女性嘅思維通常比較細密，加上喺家庭入面擔當住唔同嘅角色，例如妻子同埋母親，要兼顧工作同家庭生活，令到佢哋更加容易明白到客戶嘅需要同諗法，有更強嘅同理心，因而能夠提升客戶滿意度，更容易得到客戶嘅信任。

不過呢，Queenie都好體貼咁提到，女性從業員可能要面對工作同家庭責任兩方面嘅壓力。佢建議話作為管理層，要多啲了解女性同事嘅實際需要，喺適當嘅時候提供支援同培訓，平衡家庭同事業發展。

喺聚會尾聲，Queenie重申，雖然科技發展一日千里，但保險始終係「以人為本」嘅行業。只要從業員願意與時並進，善用科技嚟提升工作效率，同時保持以客為先嘅服務態度，就一定可以喺呢個行業發光發亮。

聽完Queenie嘅分享，我相信會令唔少從業員對行業前景更加充滿信心！喺呢個AI年代，唔少人擔心科技會搶晒從業員嘅飯碗，但其實只要我哋肯用啱方法，AI反而可以成為我哋嘅最佳拍檔。好似Queenie所講，保險業最緊要係以人為本，靠嘅係專業知識同埋真誠服務。而家有AI幫手處理文書工作，等我哋可以專注喺服務客戶度，咁的確係更加理想。另外，Queenie亦都有提到大灣區業界帶嚟嘅機遇，不過篇幅有限，有機會再同大家分享。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。