分紅保單演示利率上限令人又愛又恨？

最近市場熱話相信都非「對等關稅」莫屬，但其實喺保險界仲有另一個話題廣受討論，全因保監局早前就分紅保單演示提出咗個新要求。坊間議論紛紛，有啲人仲話要趕尾班車，究竟真相係點呢？今期就同大家拆解吓呢個令人「又愛又恨」嘅新措施。

講開分紅保單呢個話題，相信唔少朋友無買過都有聽過。以往有啲保險公司喺演示預期回報嗰陣會標示得比較進取或「理想」，令到數字睇落去相當吸引。作為客戶，見到預期回報咁好，自然係開心啦，但問題係呢個預期回報到底實現到幾多呢？會唔會令客戶對保單回報期望太高，最終失望亦越大？

保監局見到呢個情況，之前就宣布咗一項新措施：喺今年7月1號開始，港幣保單嘅演示利率上限會定喺6%，外幣保單就係6.5%。一聽到上限，梗係有人即刻驚，仲要喺社交媒體瘋傳話要快啲喺新例生效前買保險。

其實呢啲都係誤解。所謂「演示利率上限」，只係規定保險公司喺介紹新保單嗰陣，份利益說明文件唔可以寫得太過進取。換句話講，呢個上限唔會影響客戶最後實際收到嘅回報；份保單如果真係有好嘅投資回報，保險公司照舊會派高過呢個利率嘅紅利畀客戶。

咁又點解要設呢個上限呢？簡單講就係做返好個期望管理，以免實際回報同演示差太遠，等大家對回報嘅期望可以更切實際啲。對於保險業界嚟講，呢個新措施可能令人又愛又恨。愛方面，當然係可以減少從業員同客戶，因預期回報落差太大而出現的爭拗，亦可以推動啲公司諗多啲創新方法，例如設計更好嘅產品組合、改善投資策略等，提升產品競爭優勢；至於恨方面，自然係相關產品嘅吸引力減少，未必咁容易獲得客戶注意。

不過點都好，有關改動對客戶利益以至行業的長遠發展都係利多於弊，業界朋友與其擔心少咗樣吸睛產品，倒不如思考下點樣善用產品嘅優勢，為客戶提供更貼心同貼地嘅保障同財務規劃。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。