內地生意跌9成半唔使驚？IANG 2.0明天會更好

早幾日保監局公布嘅2021年上半年季臨時統計數字，內地訪客新造業務繼續插水式咁下跌96.5%，就咁睇真係嚇死人！不過背後其實係有原因嘅，皆因上年1、2月疫情爆發前，仲有唔少內地客戶來港簽單，嗰陣係成年生意最旺嘅時候，而呢次統計係計埋上年Q1最好業績嗰陣，同今年頭兩季繼續水靜河飛嘅情況，咁就梗係跌到巴巴聲啦！如果係用上年Q2比較今年Q2，咁應該無乜跌，因為上年Q2內地生意都煞停晒！

至於大家最值得留意嘅，係今年上半年長期業務嘅數據，上年全年長期業務有輕微升幅，去到今年上半年不包括退休計劃業務嘅長期業務，新造保單保費為805億元，按年升22.9%，其中個人人壽及年金的非投資相連業務新造保單保費為670億元，按年升10.3%，上半年長期業務繼續有增長，所以就算無晒內地生意，本地市場都有正增長撐住，反映保險業生命力真係好頑強，大家值得畀客戶同自己一個Like。

至於疫情重災區IANG團隊，現階段只有兩種情況，有一批唔再留喺香港返晒內地，另一批就努力適應「新常態」，轉做本地市場，其中都有唔少成功例子，例如開拓新香港人市場。有保險大隊長就教路，如果想知新香港人市場規模有幾大，可以參考本地一手樓市，因為買樓需要登記業主名，有統計指用內地拼音同香港身份證登記嘅買家佔一手市場3成，可以見到人數都唔少，既然佢哋有財力買樓，相信其他投資工具例如保險都一定唔會少。

天將降大任於斯人也，必先苦其心志，所以呢班「IANG 2.0」如果成功轉型本地市場，將來重新恢復通關，內地客可以來港之後，到時兩大客源兼備，發展機遇就更加大。

保寶達人 – 為您八盡保險天下事

更多保寶達人手記Click Here