【保寶達人】如何填補保障「深海」？壽險+XXX有得諗（上）

有留意行業大趨勢，應該都知保監局上場後，好積極咁推動保障型產品，皆因上年保監局發表《保障缺口「身故風險」研究》，計出每名在職人士嘅平均保障缺口約190萬港元，而香港整體嘅保障缺口就達到6,900,000,000,000港元（6.9萬億港元）。計我話，呢個唔係缺口（Gap）咁簡單，係「深海」（Deep Ocean）至真！

有咁大個氹要填，唔通香港人真係買唔夠保險？睇落又唔似，根據SwissRe 2019年數據，香港係亞洲當中，保費人均最高嘅市場，達到9,706美元，換算返大約76,000港元，既然香港人每年用咁多錢來買保險，點解仲唔夠？

答案其實好簡單，香港人並唔係買唔夠保險，只係買唔夠保障型產品。香港人鍾意儲蓄，所以壽險市場以Saving單為主流。其實，只要加多一份定期人壽，就可以大大加強個人保障。不過定期人壽呢種純保障型產品，喺市場上唔算好受歡迎，所以好多Agent都唔會積極推介。

有大隊長甚至話，好多Agent根本唔識賣定期人壽，佢話好多家長通常幫小朋友買保險，大部分都係Saving單，到佢哋長大出來社會做嘢，基本上差唔多等於無保障喺身，既然每個人都有保障嘅需要，但係通常啲Agent都會繼續Sell佢哋開Saving單。反而近期銀行就做多個定期人壽嘅宣傳，因為唔少移民英國嘅人士，都有需要喺走之前做定張定期人壽，用來對沖嗰邊嘅遺產稅高稅率，如果個Agent根本唔知個客有咁嘅需要，張單就可能畀銀行做咗。

咁究竟呢個保障「深海」，係咪難以跨越嘅鴻溝呢？保險達人就覺得，專業嘅Agent絕對有能力，亦有責任幫客戶填返，只要識得用人壽保單，加埋另一種金融工具，兩者結合就可以大大提升保障，至於究竟係咩工具呢，下期揭曉！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。