【保寶達人】保險大隊長應該點樣實踐ESG？

ESG（環境、社會及管治）係近年金融界最Hit嘅關鍵詞，以往通常講緊投資或者綠色貸款，同保險關係唔算好大，但最近市場上開始出現「綠色保險」產品，未來相信同類產品將會愈來愈多，同埋政府推出「綠色和可持續金融培訓先導計劃」，開始接受合資格培訓機構同資歷登記申請。如果想跟上呢個市場大趨勢，保險Agent都要對ESG有一定認識先得。

因為氣候變化殺到埋身，多咗人開始關注「E」即係環境議題。而家有唔少Agent團隊都以百人計，如果每個人都做多啲保護環境嘅工夫，集合埋都可以發揮唔少影響力，例如近年大家見客好多時經已做到無紙化，因為用平板電腦都可以簽單，計返已經慳落唔少紙，另外疫情下大家都多咗用視像方式同客戶溝通，某程度上可以減少揸車出行，減少碳排放。

至於「S」即係社會，呢一點同提升保險行業形象好有關係，而家有唔少Agent團隊主動號召同事一齊做義工，幫助社會上有需要嘅弱勢社群，一啲保險行業協會亦積極舉辦慈善籌款活動，好似「保協」嘅全港保險愛心公益日同生命傳愛慈善跑咁，都贏得唔少掌聲。

最後唔好忘記仲有「G」即係管治，雖然Agent團隊唔係企業，唔使好似上市公司咁符合監管要求，不過做得團隊領袖，或者行業協會嘅董事，喺管治方面絕對有重大責任，除咗要為個團體嘅未來發展審視風險，仲特別要留意反貪污工作嘅監察同教育，因為呢類貪污個案真係一單都嫌多。

而家既然ESG係唔可以唔知，專門為保險從業員而設嘅ESG或綠色保險相關專業資格絕對係有得諗，有影響力嘅保險行業協會好快啲行動喇！

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。