【保寶達人】通關OPEN！IANG團隊終於等到「大翻身」機會？

大家等待又等待嘅通關，終於喺1月8日正式恢復，「冰封」近3年嘅內地訪客業務終於解封！究竟各大寶號嘅IANG團隊，能唔能夠借呢次機會「大翻身」呢？

那些年未有疫情之前，內地訪客業務佔香港保險業年度新造保費4成以上，隨住香港與內地全面通關重臨，疫後內地居民都會更注重健康及生活保障，對醫療保險及財富保障方案需求應該會持續上升，內地訪客業務好有機會從谷底反彈，出現強勁嘅復甦趨勢。

有大隊長就話，到依家都仲喺度嘅IANG團隊，可以話係實力強勁，一係轉型成功，開發到本地市場，一係之前風光時有妥善規劃，積落唔少仲捱到落去。更加多嘅情況，係好多IANG已經返內地做其他嘢，或者返咗內地掛牌，而家剛剛恢復通關，相信各個寶號嘅IANG團隊都需要一段時間重組同磨合，先可以重現過往嘅輝煌，到時睇吓邊間寶號可以率先跑出。

通關除咗重啟內地訪客業務，仲有更重要嘅一層意義。最近香港政府公布嘅保險業發展藍圖，明確闡述咗鞏固香港作為成熟完備保險樞紐定位嘅願景，長遠而言，強勁復甦嘅內地訪客業務同埋本地市場持續嘅強勁需求，相信可以發揮關鍵作用。

更加重要嘅一點，係重新通關之後，中港保險業人士可以跑出螢光幕，多啲舉辦實體活動交流，特別係1小時生活圈嘅粵港澳大灣區市場，其中香港嘅保險行業協會就可以發揮橋樑作用，進一步連接內地與香港保險市場，有助推動保險業全面融入國家「雙循環」策略。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。