【保寶達人】保費融資vs保單融資 加息周期邊個大鑊啲？

一聽到「保險融資」，好多行家都會即時諗到「保費融資」，因為早兩年未開始加息周期嗰陣，呢種賺息差嘅做法非常流行，但市場上其實仲有「保單融資」，個名好似，又都係向銀行融資，但玩法就有啲分別，面對嘅風險亦唔同。

以上兩種都係涉及保單嘅融資方式，「保費融資」係指投保人向銀行貸款，用作支付購買一張大額儲蓄保單嘅一筆過保費，個玩法有啲似買樓申請按揭，投保人只需要付出首期，餘額向銀行申請貸款去支付。雖然期間要支付銀行利息，但因為還息不還本，如果借貸息率低過保單嘅回報，就可以賺息差，所以早幾年低息環境，有個別保險公司力谷「保費融資」，做到係行頭出晒名。

「保費融資」面對嘅最大風險係利率急升，只要市場開始進入加息周期，銀行加息成件事就唔同晒，因為保單紅利好有可能冚唔到利息成本，到時呢啲槓桿操作就會失效，如果係單冚單甚至有機會「爆煲」。而家銀行拆息高企，以常見嘅H+2厘計接近7厘，想賺息差簡直係笑話。而家去銀行就咁做定存可以去到5厘息，邊個仲會走去冒咁大風險做「保費融資」，所以近排「保費融資」宣傳都靜咗好多。

慘在喺早幾年透過「保費融資」買咗呢類產品嘅投保人，佢哋當時的確食正低息，但係過咗一年銀行息口急升，已經係另一個世界，頂唔到嘅話就要退保，雖然呢類儲蓄單早期退保都有唔少現金價值，但係倒蝕一截都好難避免，惟有「啞子食黃蓮」。

至於「保單融資」就唔同喇！係指保單持有人將已供完，有現金價值嘅保單作為擔保，向銀行進行融資，風險方面相對保費融資低好多，因為張單經已供完，借貸人只係需要負擔銀行利息就得，就算息口急升，都可以隨時贖回，最多蝕少少息。

保寶達人 – 為您八盡保險天下事

更多保寶達人手記Click Here

任何於本文章的評論或意見純屬來自個別嘉賓/隊長等，並未代表保協之立場。